Omnibus presens scriptum cernentibus vel audientibus Cristiernus dei et apostolice sedis gracia episcpus Ripensis salutem in domino sempiternam ♦

Si ea que acta sunt ad necessitates seu utilitates hominum consvevit antiquitas ad eternam rei memoriam in scriptis redigere multi magis que ad cultum divinum / et profectus animarum ordinata sunt / ne lapsu temporis pereant opotet scripture testimonio roborare ♦

Hinc est quod constare volumus universis / quod nos habita diligenti deliberacione / et prudentum consilio / anime nostre salubriter intendere cupientes quoddam altare in majori turri ecclesie nostre Ripensis ad honorem omnipotentis dei beate Marie virginis / sancti Lucii martiris et omnium sanctorum ac in remissionem peccatorum nostrorum / de consensu dilecti capituli nostri fundari fecimus et opere consummari domino deo suffragante / ac cum possessionibus infrascriptis justo empcionis et permutacionis titulo acquisitis dotavimus et dotamus per presentes ♦

Primo videlicet cum curia residenciali Ripis per dominum Nicholaum Bomgarth / condam possessorem et vicarium ejusdem altaris erecta et constructa in quodam fundo a parte occidentali ecclesie nostre Ripensis intermediante platea communi sito xlvii ulnarum continente / a parte orientali protendente vero se ad aliam communem plateam a parte sua occidentali cum sua vera et justa latitudine nil excepto quem eciam fundum nos titulo justre permutacionis acquisivimus in recompensam pro bonis in Seem / pronunc mense episcopali deputatis / videlicet pro curia principali Seemgarth et aliis bonis quorum proprietatem justo (!) empcionis titulo acquisivimus ab Helena relicta Erici Jone armigeri et aliis heredibus ipsius Erici Jone in parochia antedicta Seem situatis / pro centum sexaginta marcis Lybicensibus per nostram industriam acquisitis prout in litteris super hiis confectis satis claret ♦

Item una curia cum suo fundo / in parochia sancti Clementis Ripis ex opposito ecclesie fratrum minorum in occidens situata / in qua condam residebant dominus Esgerus canonicus Ripensis / et Johannes Olavi post eum ♦

Item cum omnibus et singulis bonis nostris in parochia Moltæ in Moltæ hæreth sitis / videlicet Abskowgarth / que est curia principalis ♦ Item una curia ibidem in qua Jacobus Gødhsøn inhabitat ♦ Item una curia in Estropp in qua inhabitat quidam Eleff ♦ Item una curia in Eskelund / quam inhabitat Nis Horth ♦ Item una curia in villa Ploustropp / quam quidam Stephanus inhabitat / cum omnibus bonis nostris desolatis in Molthæreth sitis emptis a domina Berta relicta Laghonis Kanuti cum aliis bonis pignoraticiis edificatis seu desolatis in Nør jucia et Sønner Jucia ubique situatis / que eciam juste acquisivimus a domina Berta prenotatam prout in litteris super hiis confectis plenius continetur ♦

Item una curia in parochia Høthn in Jærleff hæreth quam inhabitat Petrus Ivari / quam acquisivimus a domino Petro Andree in Pughdall ♦

Item una curia in Dyssling in parochia Brunlæ in Jæling sysell / cum desolato molendino ibidem / et cum jure in ampne pro anguillis capiendis videlicet algarth / ♦

Item una curia in Ænghbergh in Wandfalk hæreth in Harth sysel / que nobis in pignore obligatur pro quindecim nobilianis pleni ponderis a domina Ingheburgh relicta domini Pridbiørn Podbusk militis cum omnibus litteris et documentis super hiis bonis omnibus conjunctim et divisim confectis et omni jure in alto et basso nobis in hiis competenti cum universis et singulis dictorum bonorum attinenciis / agris pratis pascuis silvis piscaturis humidis et siccis nil penitus excepto ad sustentacionem dicti altaris / ac divinorum officiorum / aliorumque sibi necessariorum conferimus ac ea assignamus jure perpetuo possidenda ♦ Sub hoc modo quod sacerdos seu vicarius qui ad ipsum altare domino ministraturus fuerit institutus / per se vel per alium missam quotidie ibidem celebrare teneatur / legittimo inpedimento cessante / dominum deum pro salute anime nostre / et parentum nostrorum / pie exoraturus ♦

Item volumus et ordinamus / quod nobis et domino Nicholao Bomgarth de medio sublatis episcopus Ripensis / quicumque pro tempore fuerit cuidam canonico in ecclesia Ripensi per capitulum presentato supradictum altare / cum omni jure suo conferat qui in ipsa curia fundi antedicti resideat et edificia in ipso constructa in suo bene esse conservet anniversariumque nostrum et parentum nostrorum / cum missis et vigiliis in ecclesia Ripensi fieri consvetis die obitus nostri cum octo solidis sterlingorum capitulo Ripensi annuatim solvendis de redditibus bonorum eorundem faciat celebrari ♦

Ne igitur super hac ordinacione nostra / aliqua imposterum suboriri poterit ambiguitas seu calumpnia presentes litteras sigillo nostro et dilecti capituli nostri memorati duximus roborandas ♦

Datum anno domini mcdxxxviii sabbato ante dominicam trinitatis ♦