Omnibus presens scriptum cernentibus Nicolaus Bomgardh rector ecclesie in Seem salutem in domino sempiternam.

Noverint universi presentes et futuri quod anime mee saluti intendere cupiens ex maturo consilio altari beati Lucii martyris sub mayori turre per venerabilem patrem dominum Cristiernum episcopum Ripensem constructo et dotato ob salutem anime mee et parentum meorum omnia edificia per me constructa seu nomine meo ac deinceps construenda in fundo ipsi altari deputato in quo pronunc resideo ad partem occidentalem ecclesie Ripensis sito a platea communi ab uno fine ad plateam communem ex alio fine contingenti. do assigno et scoto per presentes jure perpetuo possidenda. nichil juris reservans heredibus meis seu alteri cuicunque post mortem meam in eisdem. Tali condicione quod vicarius ejusdem altaris qui pro tempore fuerit mei et parentum meorum memoriam in singulis missis suis in perpetuum habeat prout coram summo deo curaverit respondere.

In cujus donacionis alienacionis et scotacionis testimonium et evidentiam firmiorem sigillum meum una cum sigillis virorum discretorum videlicet Lydichini Hartle<vi>A Bertoldi Broderi proconsulum, Petri Nicolai et Mathie Korner consulum Ripensium presentibus est appensum.

Datum anno domini mcdxxxviii^o in vigilia sancti Thome apostoli.