Jk Heyne Brand borgher to Hamborgh / bekenne vnde betughe openbare in desseme breue vor allisweme / dat ik my mid deme hochgebornen fursten vnde heren hern Alue hertoghen to Sleszwijck to Holsten Stormeren vnde Schouwenborgh greuen / mynem gnedighen leuen heren / vmme alle penningkschuld / dar he my vnde mynen eruen / van der hochgebornen fursten / hern Hinrikes / vnde hern Gherdes / ichtiswanne to Slesszwijck etcetera hertoghen / siner brodere / vnde van siner eghenen wegen schuldichliken wente vppe dessen dagh heft ane vorplichted wesen / in allerwijse alse de ersamen her Otte Sluter / vnde de gestrenghe her Diderik Blome ritter / twischen demesuluen heren hertoghen Alue vnde my gedeghedinghed hebben / vrundlichken vorghan vnde vordreghen hebbe / vnde late den genanten heren hertoghen Alue van sulliker vorscreuen penningkschuld / vor my vnde myne eruen / qwijt leddich vnde los / in desseme breue / vtghenomen sodane renthe alse ik vnde myne eruen hebben in Eyderstede / Euerschop / Vtholme / vnde to Hillighelande / der willen ik vnde myne eruen na jnneholde sodaner openen beseghelden breue / alse wij darup hebben / sunder iemendes insaghe brukaftich wesen / ♦

Vnde ik schal mid deme genanten heren hertoghen Alue mogheliker bede mechtich wesen / vnde sine slote . vnde sin brod scholen my vnuorsecht wesen / ♦

Des to ener groteren witlikheid hebbe ik Heyne Brand vorbenomet myn jngheseghel / vor my vnde myne eruen witliken vnde mid guden willen hanghen heten to dessem breue / ♦

Gheuen na Godesbord verteinhundert jar darna in deme neghenvndedrittigesten jare am sondaghe alse men singhet oculi in der hillighen kerken ♦