Nicolaus episcopus servus servorum dei .. episcopo Spoletanensi et .. decano ecclesie Haffnensis Roskildensis diocesis ac .. officiali Lundensi. Hodie Johanni Brostrop, canonico Roskildensi canonicatum ecclesie Roskildensis, in qua majores, medie et minores prebende fore noscuntur, cum plenitudine juris canonici apostolica auctoritate contulimus et de illo etiam providimus, unam vero ex hujusmodi majoribus prebendis ac dignitatem, personatum vel officium ejusdem ecclesie necnon beneficium ecclestiasticum cum cura vel sine cura etiam, si dignitas, personatus vel officium in metropolitana aut collegiata vel canonicatus et prebenda in hujusmodi collegiata ecclesia foret, et ad dignitates, personatus vel officia hujusmodi consuevissent qui per electionem assumi eisque cura immineret animarum ad collationem, provisionem, presentationem, electionem seu quamvis aliam dispositionem archiepiscopi Lundensis ac prepositi, decani archidiaconi, cantoris et capituli singulorumque canonicorum et personarum ecclesie Lundensis, si qua vacabant tunc aut cum simul vel successive vacarent, que dictus Johannes per se vel procuratorem suum ad hoc legitime constitutum infra certi temporis spatium acceptaret, conferendo sibi post acceptationem hujusmodi donationi apostolice reservavimus, prout in nostris inde confectis litteris plenius continetur. Quocirca discretioni vestre mandamus, quatinus Vos vel duo aut unus vestrum, postquam dicte littere vobis presentate fuerint, per vos vel alios eundem Johannem vel procuratorem suum faciatus auctoritate nostra in dicta ecclesia Roskildensi in canonicum recipi et in fratrem, stallo sibi in choro et loco in capitulo ipsius ecclesie Roskildensis assignantes, prebendam vero etiam majorem ac dignitatem, personatum vel officium necnon beneficium hujusmodi per nos ut premittitur reservata, si vacat seu vacant aut postea vel cum vacaverint, eidem Johanni conferre curetis, inducentes eum vel procuratorem suum ejus nomine in corporalem possessionem prebende etiam majoris reservate ac dignitatis, personatus et officii necnon beneficii juriumque et pertinentiarum predictorum et defendentes inductum ac facientes ipsum Johannem vel dictum procuratorem pro eo ad dignitatem, personatum vel officium seu beneficium hujusmodi, ut est moris, admitti sibique de canonicatus et prebende etiam majoris ac dignitatis, personatus vel officii seu beneficii predictorum fructibus responderi, non obstantibus omnibus illis, que in prefatis litteris voluimus non obstare, seu si episcopo et capitulo ecclesie Roskildensis necnon archiepiscopo, preposito, decano, archidiacono, cantori, capitulo ecclesie Lundensis, canonicis et personis prefatis vel quibusvis aliis ab apostolica sede indultum existat, quod interdici suspendi vel excommunicari non possint per litteras apostolicas non facientes expressam ac de verbo ad verbum de indulto hujusmodi mentionem, contradictores auctoritate nostra, appellatione postposita, compescendo. Datum Rome apud s. Petrum 18. kal. julii, pontific. nostri anno 1.