Nicolaus episcopus servus servorum dei. Licet is, de cujus munere venit etc. Cupientes, ut ecclesia Lundensis congruis honoribus frequentetur et in suis edificiis conservetur, ac ut fideles eo libentius causa devotionis confluant ad eandem et ad conservationem hujusmodi manus promtius porrigant adjutrices, omnibus penitentibus et confessis, qui in festivitate Kanuti regis ecclesiam visitaverint et ad conservationem hujusmodi manus porrexerint adjutrices, 7 annos et totidem quadragenas de injunctis eis penitentiis relaxamus. Et ut Christifideles ad ecclesiam predictam confluentes conscientie pacem et animarum salutem consequantur et ut indulgentiarum melius participes esse possint, ut frater Two modernus ac ejus Lundensis archiepiscopi successores 4 presbiteros ydoneos, seculares vel regulares, in confessores eligere possint, ac in ecclesia deputare, qui confessiones quarumcumque personarum ecclesiam in festivitate hujusmodi visitantium audire et earum confessionibus auditis eisdem pro commissis criminibus debitam absolutionem inpendere valeant ac injungere penitentiam, nisi talia fuerint, propter que sedes apostolica sit consulenda, de uberioris dono gratie indulgemus, presentibus perpetuis temporibus duraturis. Volumus autem, quod si alias visitantibus ecclesiam aut ad ejus conservationem seu fabricam manus porrigentibus adjutrices aut alias pias inibi elemosinas erogantibus seu alia indulgentia in perpetuum vel ad certum tempus nondum elapsum duratura per nos concessa fuerit, presentes littere nullius existant roboris vel momenti. Nulli ergo omnino hominum etc. Datum Rome apud s. Petrum 11. kal. januarii pontific. nostri anno 1.