ILla DAnorum SOPhiæ SEcundæ
Forma REginæ: Patre Meglapyrgo
Ortæ VDalrico, Holsteniaque matre
ELIsabetha.
Quæ pio Regi socia est Secundo
Iuncta DAnorum FRIderico, ab ipso
Autor est vitæ socialis, et qui
Fœderis auspex.
Quæ suo binas Domino decoras
Numinis, Nymphas peperit, fauore
Quas DEI dextræ sinefine salvas
Protegat vmbra.
Daniæ sic nunc generosa scitum
Regulum electum peperit, futurum
Regij hæredem diadematis, post
Fata Parentis.
Quid loquar mores SOPhiæ pudicos
Pectoris vera pietate natos?
Est Charis, mitis, proba, gratiosa,
Casta, pudica.
Virginis Natum MAriæ colendo,
Eius in puro sacra iussa corde
Condit, huic vni placuisse tota
Mente laborat.
Sic suum Regem Dominum colitque:
DAnici Regni sacra sors salutis:
Orphanis, mœstis, Viduis, egenis,
Mater et altrix.
Da DEVS longum SOPhia ista Regno
DAnico, Regi pariter marito
Viuat: vt cunctis ea sit saluti,
Christo et honori.
