Incipiunt gesta gloriosi regis et martyris Canuti.

Transcursis litoreis remigiis et adiacentium regionum intuitu iam saciatis obtutibus ad altum pelagus tendentes ratis nostrę rimas sollerti industria obstruamus, ne qua uena insidiantis equoris nauigantes intercipiat; et erecto crucis dominicę ligno uela uirtutum in altum resurgant, quo Syrenarum cantus auribus obtusis ueloci Euro perflante discurrentes, herois nostri meritis ad sinum optati portus delatis, anchoram spei nostrę diuinę affigamus clementię, ne spiritualium mercium nauim scopulorum aduersitas intercludat et litorea gaudia, gazis porro uectis iam sparsim unda nantibus, fletuum planctibus admisceat.

Sed qui dixit: »Aperi os tuum, et ego adimplebo illud«, sensus nostri labia et oris dirigat eloquia, ut sic militis eius efferamus preconia, quatinus maiestati illius tractemus complacita.