Ipse uero post fratris excessum a seculo diuinitus sibi prouiso promotus imperio regum se domino obsequiis mancipabat fidelibus, ut eius protegente auxilio tam a terrestrium quam et ab aeriorum hostium muniretur incursibus. Famelicos fouebat et pauperes, nudos uestiebat et algentes, orphanis et uiduis clementer succurrebat, peregrinos et egentes misericordię stipendiis sustentabat.

Ordinis religiosi uiros quosdam ut dominos quosdam ut patres honorabat, ministeriorumque spiritualium sacraria regalium munerum donis adornabat. Sanctas sanctorum dei ecclesias diurni cursus sacratum ordinem auditurus assiduus frequentabat, et, quę ibi capaci percepisset auditu, preciosi pectoris armario recondebat. Ad quę eum diuinus incitabat spiritus, ut in seculum seculi permaneret memoria eius.