Regum quamplurium, sed et ipsius Salomonis, deuitans lasciuiam, ob quam eius quondam posteri bis quinis regni partibus ablatis uix duabus irato deo principari merebantur, imperatorii generis nobilissimam sibi coniugem sapientum consilio elegit. Qua insigni honorificentia ex occidentalibus horis adducta, secundum nominis eius estimationem, quę Ethela (id est: nobilis) dicebatur, nobilem nobiliter excipiens impudicis concubinarum despectis amplexibus solius eius conubio, Ihesu Christo teste angelisque eius, contentus est. Sed et, quemadmodum de beato Job dicitur, causas utiles, quas nesciebat, diligentissime inuestigabat et cum prudentibus et religiosis sepius pertractans, qualiter fidei christianę religionem in regno suo in dies adaugeret, assidue reuoluebat.

Multa siquidem antiquitus tradita in presens obseruari sagaci industria perspiciebat, quę magis pro diuina essent iusticia corrigenda quam ob uulgi fauorem exequenda. Quę superni arbitris inspirante gratia cohercere disponebat; sed indomitę gentis feritas et innata duricia uoluntatis eius effectum in dies differebat. Et quia, ut Veritas attestatur, omnis, qui male agit, odit lucem et non uult uenire ad lucem, ut non arguantur opera eius, hi, qui magis prauis usibus inherere et uoluntarie cupiebant in peccatis iacere quam iniuste obseruata iusticię ratione audita relinquere, uanitati eum insistere et ueluti nouiset inauditis adinuentionibus operam dare in suis conuenticulis querebantur;

ac ob hoc, qualiter iugum dominationis eius ab indomitis et hactenus inflexis et duris contumatię suę ceruicibus excuterent, haud diuini spiritus illustratione inflammati, sed alieni spiritus suggestione inflati consiliabantur. Homo enim carnalis non percipiebat, quę regio pectori omnis scientię spiritus infundebat. Nam cum ipse eos a peccati seruitute eripere et ad iusticię libertatem conaretur reducere, audiendo non intelligentes et obcecati uidentes ueluti antiquę pacis et quietis inuasorem ac pristinę libertatis eum deputabant ereptorem.

Iccirco congregauerunt iniquitatem sibi et egrediebantur foras: foras egressi sunt, cum iusticię diuinę sua statuta preferendo dei iusticię subiecti non sunt; ac per hoc a iustorum consorcio sequestrati et a terminis eorum eiecti iniquorum collegio sunt deputati, quia uoluntarie serui peccati sunt effecti. Quapropter in laqueum, quem pedibus innocentis parauerunt, incidentes et in foueam, quam foderunt, corruentes Iudeorum emulatores extiterunt, quia uicia eorum increpantem ferre nequiuerunt. Sed relatu perditionis eorum suo tempori reseruato ad uirtutum nobilitatem magnifici herois nostri explicandam redeamus.