Classe igitur parata Danorum exercitus Occidentalis portus litoribus uelis sinuatim distensis aduehitur ibique regię classis aduentum in dies prestolabatur. Rex uero in loco celeberrimo, qui ab eiusdem quondam loci domina Ethe Ethebi uel ab situ campestri Hethebi nomen accepit, quod de Danica lingua interpretatum Campi uilla dicitur, demorabatur cum prudentibus et sapientibus pertractans, qualiter res cępta ob multorum profectum Ihesu Christo auxiliante ad decentem perueniret effectum.

Sed quemadmodum Israeliticus quondam populus Moyse cum deo confabulatum demorante ab Aaron deos sibi fieri, qui heremiticę eis uię ducatum preberent, exposcunt et ob hoc irato deo desiderati soli tam uisu quam et usu priuantur, ita et uulgus hic impaciens morę litoreę detentionis prestolationes domesticis inutiles negotiis querebatur et aut ad propria remeandum siue principem eis alium expeditionis rege aliis intento eligendum seu regi nuncios cum sua quantocius classe accelerandi consilio crebrius inito transmitti uociferabatur. Quorum strepitu frequenti diurnisque clamoribus principes moti regi nuncios transmittere querelasque parati exercitus regiis decernunt auribus insinuare.

Cuius legationis Olauus, eiusdem gloriosi regis frater germanus, haud felix executor effectus regem cum comitibus adiit, exercitus mandata depromit, causas questuum libere perorans ostendit. Porro rex perspicacis industrię negocio diutius pertractato Rodberto, occidentalium nobilissimo duci, sibi per filiam (reginam scilicet Ethelam) propinquo, fratrem suum eundem reseruandum in Flandriam transmittit exercituique per internuncios, quę uolebat, remandauit.

Verum autumno imminente remissis legatis non minima instantia omnis multitudo interpellat, ut ob domesticorum usuum negocia exercitum ad propria remeare iubeat, uernali tempore classem uniuersam, quocumque delegasset, paratam habiturus. Quod rege nobilibus magnatibusque interuenientibus annuente anchoras leti savulis eripiunt, tentoria superaffixa iaciunt et mali suprema erigentes uela uentis admittunt, altumque pelagus petentes et regi prospera imprecantes