Verumtamen, ut proposita persequamur, regalium negociorum executores siue exactores plus iusto in causis exaggerandis insistere, staterarum pondera adaugere, rerum quarumque precia uilipendere et, ut uulgariter edisseram, unciarum ualentiam uix solidi precio admittere; iudicia, ut tradunt, peruertere, nobilesque, quemadmodum et ignobiles, ui et potentia opprimere contendere. Quorum insolentia quamplurimi exacerbati, maiores natu ira simul et inuidia accensi, omnes in regium principem consilio et armis irrumpere et tam in eo quam et in illis, nunciis circumquaque intermissis, publicas, ut arbitrantur, iniurias uindicare.

Discurrunt ergo impietatis et dementię intercussores et non modo ad scelera promptos, uerum etiam simplicium atque innocentium incitant animos, ut complices scelerum multiplicent et ueritatis ac iusticię ius usquequaque perturbent. Proh dolor! abundans exurgit iniquitas, refrigescit et tepescit caritas; fas substernitur et nefas extollitur. Plebs ad omne scelus incitatur et ueluti belua ad deglutiendum parata sanguine sitibunda cupit saturari regio. Armis lacertos, crudelitate exacuit animos. Et heu ueretur, ne tempus adueniat sceleri, et ante succumbat furor, quam omne ministerium iniquitatis adimpleat.