Puppibus ergo non segniter instructis et necessariis aduectis magnificus princeps, Iucium furorem simul et ipsam Iuciam penitus relicturus, fluctiuagos sinus cum domesticis satellitibus et nouo iam certamine tyronibus experiendis ingrediens Pheonie partibus aduehitur; ubi, dum presentis securitatem quietis requirens non inuenit, sempiternę felicitatis palma et perpetua gloriosi triumphi memoria insigniri promeruit.

Tu etenim, antiquissime seductor, hęc omnia deo sinente et ad pociora disponente malicię tuę artibus et instigatione perficiens, qui quondam decorus et magnificus ob immensi tumoris contumaciam de summis celorum eiectus et post modicus in serpente uisus proauos nostros deitatis promissu seduxeras, haud mirum, si iam per unius regni spacia in hominem dei insidiarum machinas distendas, cum cotidie per uniuersum orbem fidelium iter impediens ad dampnationis tuę cumulum multiplicitatem complicium sempiterno tecum igne exurendorum coaceruas.

Aggredere ergo impietatis tuę ministros et in dei seruum exacue: uiros instrue, animos incita, lacertos adarma, insidias prepara, complices sceleris accumula, ut, quanto crudelior extiterit insidiantium seuicia, eo gloriosior efficiatur gloriosi principis uictorię memoria.