CŒLORUM illustre augmentum, NOVA STELLA, quid affert?
Fatorum Vates conscie quæso refer?
Legibus, Ingenijs, Sacris, Regnisque, Monarchis,
(Eloquar an sileam?) fax ea, flamma vorax.
Fax diros populis atque vrbibus ista minatur
Ardores Martis Mulciberisque Dej.
Nec simile ostentum, ostento huic, prior audijt ætas,
Nec similes motus, motibus hisce tulit.
Macti Animi Heroes, qui tam bene congrua nostro
Detegitis cœli Mystica fata, foro.
Sacra noua, Leges frange, oppida dirue, Bello
Exhauri populos, Fulmine tange domos.
Extingue Ingenia, expolia sua regna Monarchis,
Aut nouus, aut nullus postea Mundus erit.
Scilicet hæc toties monuit sacra pagina, magno
Explenda aduentu, maxime CHRISTE, tuo.
Mundi etenim facies rugas abstersa seniles,
Est flammis decorj restituenda nouo.
Monstrauit ceu quondam, humilis cunabula Christj,
Aëre dux humilis, præuia Stella Magis:
Sic celsam exelsum, Stellam monstrare Triumphum
Christj aduenturi, crescere multa iubent.
Quem iuuet has vitiis leprosas, sanguine fœdas,
Labe ruinosas porro habitare casas?
Luce noua, LVX NOSTRA, nouam super æthera Lucem
Spondet, adest cœlis Ignea Triplicitas.
Haud retro ad veteres vestigia vertite sordes,
Ne fatui incrustet vos mala forma Salis.
Exite, exite, Ægyptum , Babylona, Sodomam;
Promittit CANAAN, hæc noua Stella, nouam.
