Tekstnet
||SUBIUNCTURUS hic sum literas, quæ Clarissimo et excellentissimo viro Domino D. Thaddæo Hagecio ab Hayk et mihi de Re Astronomica intercesserunt, quotquot earum inter meas chartas invenire licuit. Ex quo enim cum illo viro, in Electione et coronatione Augustissimi Imperatoris Rudolphi II. Ratisbonæ Ao 1575 celebrata, pergratam et constantem contraxeram amicitiam: uti est non saltem ob doctrinæ singularis præeminentiam, sed et virtutis ac integritatis, morumque ingenuitatis omni tam amore, quam honore dignissimus, eandem, quam semel ibi iucunde inivimus, familiaritatem plurimis sequentibus annis sartam tectam conservando continuavimus, disiunctionem corporum hac ratione, cum aliter fieri nequiret, compensantes. Antequam vero literas inter ipsum et me, quoties dabatur occasio, commutatas, quæ de nova stella Ao 1572 exorta et subsequentibus aliquot Cometis alijsque Astronomica concernentibus affatim tractant, exhibuero, non inconveniens duxi, quasdam præmittere ab Excellentissimo Hispanorum Mathematico Hieronymo Munosio ad insignem eiusdem scientiæ professorem Viennensem Bartholomæum Reisacherum, de huius præstantissimi Thaddæi nonnullis circa novam illam stellam placitis scripitas, una cum ipsius Thaddæi ad Munesium hoc nomine responso et huius vicissim ad illum, prout eas optimus ille Thaddæus mecum communicavit, quando prædicto anno et loco simul eramus. Cum enim hæ epistolæ tam de nova stella, cuius nos luculentam descriptionem primo Tomo Progymnasmatum Astronomicorum dedimus, docte agant, et alia etiam ad negotium astronomicum spectantia lectu non indigna contineant: me non citra rem facturum arbitror, et harum rerum cupidis gratum id futurum spero, nec ipsi Domino Thaddæo dis|pliciturum, quod eas hîc appono cæterisque præponam, cum et tempore, quo emissæ sunt, priores existant. Accedit et hoc, quod in primo nostro Tomo Progymn. astron. circa finem cap. 8, ubi in huius clariss. Munosij de eadem stella conceptiones disquiro, harum epistolarum mentionem faciam et nonnulla ex ijs verbotenus citem atque proferam, quare convenientius erat, ut eas, siquidem isthic data opera ob id omissas, hîc publicarem. Subiungam vero postea brevibus meam de earundem contentis sententiam, siquidem hoc nec ipsi Dn. Thaddæo, nec Dn. Munosio, si adhuc in vivis est, ingratum fore confidam.