AD NOBILISSIMVM VIRVM TYCHONEM BRAHE, ASTRONOMORVM HVIVS SÆCVLI
PRINCIPEM.
Ô Animæ illustres, ô terque quaterque beatæ!
Est quibus Æthereas scandere cura domos!
Hinc tua laus PTOLEMÆE viget, fundamina prima,
Te structore ingens ars habet VRANIÆ.
Proxima debetur tibi magne COPERNICE, per te
Longe aliâ, ac priscis itur ad Astra viâ.
Tertia TYCHONIS propria est, sed maxuma; cuius
Vivet Atlanteus semper in Orbe labor.
Posteritas sis grata Viris, quibus inclytus Æther
Panditur, et quorum Sidera scandis ope.
Teque sub his Ducibus Cæli penetralibus infer,
Ingenio ut superes pennipotente Polos.
Quam sapit ille etenim, quisquis super Æthera vectus,
Et Terram, et nihili terrea cuncta facit!
HENRICVS HOIERVS. F.
