QVISQVE Musarum sapiens Sacerdos,
Arte qui diuâ dominatur Astris,
Laude nunc dignum super Astra BRAHE
Carmine tollat.
Insuper Phœbi chorus, atque Phœbus
Lætus assurgens meditare decus
Quod datum nunc Astronomo perito
Numine Diuûm.
Claritas floret merito TYCHONIS,
Cui Iouis Stella et numerosa Virtus
Iam caput cingit, decoratque, ferens
Florea serta.
Vt boni sensus hilarentur usque,
Atque laudator populus supersit:
Fama miratrix uolitans per Orbem
Viuat in Æuum.
Ille Rex ATLAS sileat; PROMETHEVS
Non (luto formans homines) furetur
Amplius flammam ferulâ; stupescat
CLAVDIVS ille.
Cedat HIPPARCHVS uetus is; quod hicce
Sidera, et Cæli faciem minutim
Nouit, et solus uigili labore
Cælica pandit.
Quod COPERNICVM latuit, nec
ullus
De polo tranans reserauit unquam,
Iam potest nosci, bene iam uidetur
Mente TYCHONIS.
Notio Cæli, celer atque motus
Ætheris tantum patet ac patescet
Omnibus, multum uigilante DANO
Nocte dieque.
Quem precor supplex, propere absolutum
Vt det hoc ingens Opus expetitum.
Quod uiris doctis placet et placebit
Omne per æuum.
OLIVERIVS TVBANELLVS, ITALVS. F.
