|DEM VESTEN/ VNSERM LIEBEN BESONDERN/ TYCHONI BRAHE, HERRN ZU KNUDSTRUP.
WILHELM VON GOTTES GNADEN/ LANDTGRAUE ZU HESSEN/ GRAUE ZU CATZENELNBOGEN/ ETC.

VNSERN günstigen Gruß zuvor/ Vester lieber besonder/ Wir haben numehr ein lange zeit kein Schreiben/ noch auch etwas von ewerm Obseruationibus Mathematicis, viel weniger wie es euch ergehe/ vnd was vor Zeitungen deß orts vorfallen/ vernemen mügen/ Daran vns doch jederzeit zu sonderm gefallen geschehen were/ da vns derogleichen von euch zukommen. Wenn wir denn hiernach ein sonderlich verlangen tragen/ so ist an euch vnser gnediges begeren/ jhr wollet vns nicht allein ewren/ vnd Daniæ statum zuschreiben/ Sondern vns auch etwas auß ewren Mathematicis Obseruationibus, vnd insonderheit ewre Obseruationes Stellarum Fixarum communiciren damit wir sie mit den vnsern conferiren mügen. Wollen euch auch ferner nicht verhalten/ daß vns von einem Thier gesagt worden/ welchs man in Norwegen finden/ vnd der König jhrer etliche zu Koppenhagen/ Item in der Friderichsburg im Thiergarten haben soll/ Vnd sollen die Thier etwas höher seyn alß ein Hirsch/ Aber gar schwancke Hörner haben/ vnd ein Rix genandt werden. Ob wir nu wol in allen vnsern Authoribus, so von den Thieren schreiben/ nachgesucht/ so haben wir doch weder Description noch Namen desselbigen nicht erfunden. Begeren derohalben an euch gnediglich/ jhr wollet vns ein Iconem von denselben Thieren machen lassen/ vnd vns denselbigen neben der Historien gedachtes Thiers/ wie denn auch die angezeigte Obseruationes Stellarum Fixarum verwahrlich zuschicken/ vnd ferner die Verordnung thun/ daß beygelegte Brieffe vnserm Mathematico vnd lieben Getrewen Christoff Rothmann verwahrlich zugeschickt mögen werden. Daran thut jhr vns zu sonderm gefallen/ vnd wir seynds jegen euch in Gnaden/ damit wir euch gewogen/ zu verschulden wol geneigt.