||DEM VESTEN/ VNSERM LIEBEN BESONDERN TYCHONI BRAHE, HERRN ZU KNUDSTRUP.
WILHELM VON GOTTES GNADEN/ LANDTGRAUE ZU HESSEN/ GRAUE ZU CATZENELNBOGEN/ ETC.

VESTER lieber Besonder/ Daß jhr vns vnderm dato Vraniburg. am 2. Aprilis zu verstehen geben/ daß jhr jetzo den ersten Tomum de Recentioribus cœli Phænomenis in Druck zu verfertigen fürhabt/ vnd vns denselbigen zu communiciren erbotten/ das ist vns vmb so viel desto lieber gewesen zu vernemen/ dieweyl jhr in gedachtem Tomo quasi ex professo Stellarum Fixarum (darnach wir so lange zeit besonders verlangen gehabt) nicht allein tractieret, fsondert auch etliche hundert Stern auß ewern Obseruationibus emendiret erzehlen thut. Wollen demnach desselben Operis gewertig seyn/ mit Gnaden zu verschulden. Anlangendt vnsern Mathematicum, hat er sich zwar vor etlichen Monaten bey vns seiner Leibs Kranckheit halben beklagt/ Ist aber/ vnangesehen er vns schrifftlich zu verstehen geben/ vnd wir jhm solchs gnediglichen befohlen haben/ gleichwol nicht angelangt. Daß er aber nicht wider kömpt/ können wir vns nicht gnugsam verwundern/ vnd machen vns schier die gedancken/ oder Suspition, daß er etwan ein schwere vnd schedliche Kranckheit habe/ Je lenger er nu denselben bey sich hat/ je erger es mit jhm wirdt werden. Was das Riens betrifft/ ist ein Denischer Jung bey vns deß Geschlechts ein Bilde/ der hat vns davon gesagt/ daß dero im Thiergarten zu Friderichsburg/ Jtem/ zu Koppenhagen/ etliche seyn sollen. Wir haben jhn auch gefragt/ obs der Reiner seyen/ hat er nein gesagt/ sondern seye gar ein hoch Thier. Alß haben wir in libro Germanico Gesneri de Animalibus Anno 1563. zu Zürich gedruckt folio LXXXV. Iconem et descriptionem desselben gefunden/ Aber bey denen/ so mit der Königin hieraussen zu Wolffenbüttel gewesen/ keinen bericht davon haben können. Der Rhenen Böck oder Thier haben wir auß Schweden auff zwey mal fast in die hundert stück lassen abholen/ die sich auch in Winterzeit gantz wol gehalten/ vnd auffm Eiß den Schlitten/ jhrem brauch nach/ gezogen/ So baldt aber die Werme eingetreten/ alle gestorben/ daß wir also sehen/ daß sie sich im Sommer/ vnd wenn die Werme antrit/ hier zu Landt nicht halten können. Was aber die Elendt betrifft/ haben wir eines in vnserm Thiergarten zur Zapffenburg/ helt sich von Martini biß auff dato noch wol/ leufft vnd springt/ vnd ist guter ding/ vnd sonderlich wenn wir in vn|serm Thiergarten auff vnserm grünen Wäglein herumb fahren/ leufft er den nechsten zu vns zu/ vnd wartet auff vns alß wenns ein Hund were/ Aber die Gehörn wollen jhm nicht sehr wachsen/ vnd seyndt biß auff dato nicht vber eins |Fingers lang. Ob nu das etwan ein Signum seye/ daß sie sich nicht wol wöllen in diesem Landt arten/ das wirdt man sehen. Wir haben wider in Schweden geschickt/ ob wir dero mehr bekommen köndten/ Wo aber jhr vns eins oder zwey/ sonderlich die da zahm weren/ zuschicken kündet/ daran thet jhr vns zu sonderm angenemen gefallen/ Wir wollens auch in Gnaden hinwider erkennen/ vnd euch die auffgewendte Vnkosten vnd Zehrung gnediglich erstatten. Was denn anlangt die begerte Papiermacher/ mögen wir euch gnediglich nicht verhalten/ daß wir vnder vns einen eintzigen haben/ derselb richtets allererst an/ vnd macht sehr schro Werck/ wie auß gegenwertigen Papier/ vnd euch zugefertigtem Brieff zu sehen/ Wir wollen vns aber zu Franckfurt vmbhören lassen/ ob wir nicht ein oder zween darzu bewegen köndten/ daß sie sich zu euch begeben wolten/ Doch müssen wir zuuor wissen/ welcher gestalt jhr sie halten vnd vnderhalten wollet: Wollen wir alßdan jhre Abfertigung auffs ehest befördern helffen. Wolten wir euch/ dem wir mit Gnaden sonders wol gewogen/ also gnediglich nicht verhalten.