CUM disiungerer a te Ratisbonæ hyeme præterita, nobilissime D. TYCHO, non minus mœroris reliquit ea disiunctio nostri quam tuus lætitiæ adventus attulerat. Nam postquam te ex primo congressu mutuoque nostro colloquio cognovi, ita eram studio tui propter tuas eximias ingenij dotes et maximas virtutes incensus, ut tum demum conquiescerem animo, cum tecum essem. Itaque tam citam a nobis disiunctionem, quæ me dulcissimo fructu iucundissimæ conversationis nostræ privavit, non potui non dolere et conturbatiore animo ferre, neque illi ullum aliud levamen afferre potui, quam amorem et cogitationem tui, ut cum corpore tecum esse non liceret, saltem animo amantissimo tecum essem. Ac talem meum animum erga te iamdudum declarassem mea epistola, |nisi toto hoc præterito tempore multis hisque maximis fuissem districtus occupationibus, præsertim vero forensi quadam lite, cuius causa etiamnunc hîc me commorari diutius quam vellem oportet. Illa negotia, mi TYCHO, adeo me perturbarunt, ut hactenus neque in studijs nobis communibus, neque in his quæ mecum liberalissimo animo communicasti, quicquam facere potuerim. Sed dabit Deus his molestijs quoque finem. Noster PIRCKMANNUS Ratisponâ domum reversus, re communicata cum fratre suo de opere TRAPEZUNTIJ imprimendo, quod Basiliensibus Typographis ipsemet consultore, ut scis, daturus eram, studiose a me fratris nomine binis literis petijt, ut sibi imprimendum concederem. Ego qui præ ceteris ipsi gratificari cupiebam, proximaA Quadragesima misi opus illud. Nunc tantopere expetitum plane negligere videtur. Nuper enim scripsit ad me fratrem suum cum PLANTINO de impressione agere velle, putare etiam quosdam, antea in Italia fuisse evulgatum hunc librum. Hinc videtur extinctum esse desiderium excudendi operis. Ego vero impressum antea fuisse non existimo. Nusquam enim exstant exempla etiam in Bibliothecis clarorum virorum. GESNERUS quoque in sua Bibliotheca mentionem faciens operum TRAPEZUNTIJ et pro more suo loca, ubi singula impressa sunt indicans, huius nostri operis meminit quidem, sed non ait aliquando fuisse impressum. Utut sit, ego doleo quod librum non habeam in meis manibus et quod vagetur incertis sedibus. Utinam saltem integer redeat ad me, non facile deinceps exibit et custodietur arctius. De nostra stella an aliquid annotaveris, scire aveo. Ego meam responsionem contra RAYMUNDUM hyeme præ|terita miseram imprimendam Francofurtum WECHELO, ut prodiret ad ferias Paschatis. Is vero cum primo spem fe|cisset, tandem nimis sero se excusavit imprimere non posse. Quoniam autem ea responsio iam antea fuit in multorum manibus, quibus legendam et iudicandam dederam, omnesque evulgationem eius expectabant exoptabantque, maturare editionem oportuit. Itaque curavi illam Pragæ excudi. Eius exemplum tibi mitto, rogoque ut eam legas, et quæ tibi in ea displicuerint, in ijs me libere moneas et coarguas. Si quid præterea habueris ex tuis observatis distantijs stellarum, aut quidpiam aliud, mecum communicare ne graveris rogo. De HEMMINGIO vestro et statu Ecclesiarum vestrarum aliquid etiam adijcies. Tuo Achati quem tecum adduxeras Augustâ, si adhuc tecum est, adscribo salutem.