CUM ex liberalitate et optimo erga me studiaque astronomica animo serinissimus rex Daniæ, dominus meus clementissimus, astronomiæ instaurandæ gratia insulam Huenam mihi addixerit, in qua meis sumptibus extruxi arcem in varia domicilia ad literarum studia, exercitia astronomica, chymica, opificia, oblectamenta et ad alios usus distinctam et distributam; cui arci Uranieburgo a studio astronomico nomen indidi. Ut igitur et voluntati regis nostri et multorum de me expectationi satisfacerem, ab annis pluribus omne meum studium et operam in instauranda astronomia posui, iamque nonnulla in ea arte elaborata habeo, cætera sub incude, ut dicitur, versantur, adornantur et expoliuntur. Quæ omnia in reipub: literariæ commodum omnibus communia facere vellem, nostris prælis in eadem arce excusa. Verum plurimum vereor ne maximis meis impensis, quas tum in typographiam, tum in opifices feci, et in excudendis operibus mathematicis adhuc facturus sum, defrauder, si labores mei maximis sumptibus comparati ab alijs typographis in Germania et sub ditione Maiestatis Vestræ recudantur et divenduntur. Quare Maiestatem Vestram cum omni submissione rogo, quæcumque ex mea officina in mathematicis studijs proditura sint, sive à me elaborata, sive illustrata, ne ea a quoquam typographo recudantur, clementer privilegio ad decennium cavere dignetur, idque sub mulcta transgressoribus irrogari solita. Cavebo vicissim, ne libri a me publicandi quidpiam, quod vel religionis controversiis vel reipubl: constitutioni offensioni siet, ullo in loco contineant. Et si quid Cæs: Ma: V: in hisce mathematicis studijs quidpiam à me postulaverit, aut ego intellexero qua in re gratum servitium eidem præstare possem, me semper promptum et paratum habebit, cui omne meum studium, operam, officium et obsequium humiliter defero. Et ut Cæs: Ma: V: rectius intelligat et ædificium nostræ arcis et totum animi nostri propositum mitto eidem eiusdem arcis totiusque nostræ insulæ designationem.