NON dubito, Nobilissime Domine, Mathematicorum præstantissime, quin in recenti adhuc habeas memoria, quæ in proximis nundinis FrancofordiensibusA mandato Illustrissimi Principis nostri transmittendo aliquot ObseruationesA ad T. Excell. perscripserim, et vt a T. Excell., etiam atque etiam petierim, vt his nostris LiterisA respondere dignaretur. At cumA nullum adhuc a T. Excell. viderimus responsum, valde dubitat Illustriss. Princeps noster, num eæ ad manus tuas peruenerint. Mandauerat enim Illustriss. ipsius Celsitudo, vt non tantumA suæ CelsitudinisA clementem salutationem, verumetiam ingens tuæ responsionis videndæ desiderium per ministrum tuumA tibi significarem. Quapropter cum nullus Dies intercedat, quin de T. Excell. responsione ab Illustrissimo principe nostro interroger, eiusque intermissionem semper a disiunctione locorum excusare cogar, peto a T. Excell. adhuc maiorem in modum, ne responsionem in Salutem et promotionem AstronomiæA diutius intermittat. Ipse quidem, quibuscunque possum rationibus, Astronomiam Illustrissimo Principi nostro etiam atque etiam commendare non desino: dummodo T. Excell. mihi in subsidium veniat, atque currentem et bene admonitum acrioribus calcaribus instiget. AcerA et ad palmæ per se cursurus honores: Si tamen horteris, fortius ibit equus. De Altitudinibus Stellarum Meridianis a me per Quadrantem obseruatis, inuenio Quadranti non iuste secundum Horizontis planum a Wittichio et Horologiario nostro perpendicula esse applicata, sed ostendi ab eo Altitudines Stellarum iusto et quidem integro minuto maiores, quam reuera sint: Quod licet toties Illustriss. Principi nostro ab eo tempore, quo hîc Mathematicum ago, dixerim, credere tamen noluit, donec nuper defectionem tam Horologiario, quam Illustriss. ipsius Cels. ad oculumA ostenderem. Nec dubito, quin tu quoque eundem errorem in nostris Obseruationibus iamdudumA animaduerteris. Iteratis igitur Obseruationibus inuenio correctis perpendiculis Eleuationem Poli huius loci ex Stella PolariA 51 grad. 19 min. vno scilicet minuto minorem. Ad summam, non dubito, quin pro tuo erga Astronomiam singulari Amore Nobilissimam hanc Scientiam etiam atque etiam apud Illustrissimum Principem nostrum sis commendaturus. Scis hanc Artem omnino Regiam esse, acA Regum ac Principum fauorem desiderare. Plura scriberem, præsertim de impuro illo nebulone Nicolao |Raymaro Vrso Dithmarso, qui superiori Hyeme apud T. Excell. Typographicam Literarum collectionem et ordinationem, vt opinor, exercuit, |quomodo scilicet hic te conuicijs proscindere non desierit, et quomodo te defenderim:A nisi angustia temporis me impediret. Cum nuper in præsentia Illustrissimi Principis JOANNIS CASIMIRI Ducis Palatini, etc. Itemque, Inclyti Domini a Donaw, tui honorificam, vt par erat, facerem mentionem: dici vix potest, quomodo Dominus a Donaw te commendârit, adeo vt me iam pridem tui amore flagrantem iam totum inflammârit.A His igitur bene et feliciter vale, optime TYCHO, et de Astronomia bene mereri ne desine.