Vlrich etc.

VNSERN günstigen grüs zuuor. Ehrnuester besonder lieber, nachdem Wir in Vnser ankunfft alhie befunden, das das druck pappiers, so dieß orts fur euch bestellet worden, funff vnd funfzigk reiß fertigk gewesen, weil sich gleich zugetragen, das meister Peter, der vhrmacher, auch alhie bej Vns angelangt vnd sich vernemen lassen solch pappier euch zuzubringen, so haben Wir jhm dasselb zustellen lassen, auch mit der fhur bis naher Warnmunde befördert. Das es sich aber mit Verfertigung desselben was verzogen, berichtet der meister, hat daran gemangelt, das er kejne form gehapt, so darzu gerecht gewesen, sondern hat an die formen, nach denen er das regal papier machet, noch sonderliche leisten sezen müssen, aufdas sich die grosse dieß eurs druck papiers darein recht schicken wollen, welchs denn woll zeit wegk genommen. Wir haben jhm dem meister die bezalung dafür entrichtet, wollen euch damit verehret haben, des versehens jhr werdet es nicht anders dan gnedigk vnd woll gemeint von Vns vermercken.

Da jhr Vns auch ein exemplar von eurem Opere Astronomice, wenn jhr damit fertigk, zustehen lassen wolte, thettet jhr Vns daran zu gemeinem gefallen, dan ob Wir woll die kunste nicht verstehen, mochten Wir doch gleichwoll Vnsere liberrj damit zu eurem gedechtnis gern zieren. Seindt Wir vmb euch in gnaden, damit Wir euch auch ohn das sonders woll gewesen zu beschulden gneigt.