VNSERN gnedigen Gruß zuvor/ Vester lieber Besonder. Ihr wisset euch zweiffels frey zu erinnern/ welcher gestalt jr vns hiebevor etlicher Elende halber gute vertröstung gethan/ Darauff wir auch nicht vnderlassen/ vnderm dato, den 2. Aprilis, einen eigenenA Botten mit einem Schreiben an euch haltendt/ abzufertigen/ daß/ wo solche Elende bey euch ankommen weren/ er vns dieselbige anhero bringen solte. Wir haben aber sider dem das geringste nicht vernommen/ ob solcher Botte bey euch ankommen/ oder aber ob er lebendig oder todt sey/ oder wie es sonst vmb jnen stehe/ daß vns biß noch von euch keine Antwort zukommên ist. Wie aber deme/ weil vns die Elende/ so vorm Jar auß Schweden bekommen/ alle gestorben/ vnd wir nur einen Elendtochsen/ so vns vor zweyen Jaren auß Schweden |zukommen/ haben/ derselbe dan sehr schön vnd fein zahm ist/ vnd diß Jar albereit ein fein Gehörn von anderthalben Schuhe hoch geschoben hat/ vnd jm niergendt woran mangelt/ alß daß er kein Weibichen hat/ damit er sich paren möchte. Alß begeren wir gnediglich/ woferne euch solche vertröstete Elendsthier/ vnd sonderlich ein Weibichen zukommen were/ jr wollet vns dieselbige auff vnsern kosten so baldt vberschicken. Daran thut jr vns zu angenemen gefallen. Vnd seyndt wir es vmb euch hinwider in allen Gnaden/ damit wir euch ohne das gewogen/ zu erkennen geneigt.