JCH Tycho Brahe, erbgesessen zu Knudtstrup vnd kön: maytt: zu Dennemarck ambtman auff Vraniburgk, bekenne mit diesem meinem offenen brieff, daß ich mit dem ehrnhafftenn vnnd achtbarn Andreas Meyernn, furstlichenn meckelburgischen rentmeistern, reden lassen vnndt bey jhm freund|lichen ahngelanget, daß ehr auß der rentenn von sechs hundert thallernn, so mir vber ein jahr alda zustehenn werden, ein hundert itzo zuuor außgebenn wolle, daß man dafur im lanndt zue Meckelnburgk etzliche victualien vndt andere sachenn kauffenn köntte, welche hundert thaller sollenn widerumb quitirt werdenn inn den sechß hundertt thallernn, so mir verfallenn, wann die zeit verlauffenn, daß jch oder andere von meinentwegen alßdann nur funffhundert sollenn zu fordern haben, vnndt soll dieser mein brieff ahn stadt dero hundert thaller bleibenn vnndt vorsicherung genueg seinn. Dessenn zu vrkundt hab ich dieß mit eigener hanndt vnterschriebenn vnndt mit meinem angebornenn petzschafft besiegelt.