ALLERGNEDIGSTER herr vnd vetter. E: Röm: Kay: Maytt: kann jch in vnterthenigen vertrawen nicht verhalten, wie das mir der ansehenliche vnd hochberumbte Tycho Brahe gehorsamblich zuerkennen geben, wie daß ehr auß etlichen hochwichtigen vrsachen sein vaterlandt das königreich Dennemarck zuuerlassen, vnd sich mit allen seinen jnstrumentis mathematicis vnter E: Kay: Maytt: allergnedigste protection in dem Teutschlandt niderzuthun, gentzlichen endschlossen sey. Vnd wie woll sein doctrina vnd berumbter löblicher nahme dermasßen jn vnd ausser Teutschlandt nicht allein, sondern auch E: Kay: Maytt: zuuorderst gnedigst woll bekandt, so hat ehr doch auß dem hohen vertrawen, so ehr propter conformia studia zu mir gesetzt, ahn mich gehorsamblich begert, sein personn vnd löbliche intention E: Kay: Maytt: vnterthenigst zu recommendiren. Weil mir dan vorhin wolbewust, dass E: Kay: Maytt: summus fautorA vnnd protector aller gelehrter leut, vnndt insonderheit vnter andern dem mathematico studio geneigt sein, so hab jch desto eher diese stoltzigkeit auf mich genommen, dem ehrlichen vnd berumbten man in seinem begeren zuwilfahrenn. Belanget der halben ahn E: Kay: Maytt: mein vnterthenigste bitt, sie wollen jhnen Tycho Brahe sambt seinen studijs in jhren kayserlichen schutz vnnd promotion auf- vnd annehmen, auch sich auf seine weitere vorschleg vnd gehorsamblich begeren dermassen allergnedigst resoluiren, damit ehr Tycho Brahe sehenn vnnd spuhrenn möge, das seine löbliche, hochberumbtte vnd indefessi labores ein gnedigsten mæcenatem bekommen haben. Solche ertzeigte gnadt will nit allein jch, sondern tota Germanica patria wirdt gleichsfalß gegen E: Kay: Maytt: gehorsambst zuuerdienen alletzeit geflisßen sein. Weil auch seine merita dermassen geschaffen, alßo das ehr billich pater astronomorum et unicus hujus laudatissimæ scientiæ restaurator mag genendt werden, so halt jch weitere recommendation vor vnnöttig, sondern das jch vielmehr E: Kay: Maytt: vnterthenigst deßhalben zu congratuliren schuldig mich erkenne, weil derhalben mit meinen weitern schreiben E: Kay: Maytt: nit auffhalten, sondern thue mich derselben zu kayserlichen hulden vnnd gnaden vnterthenigst beuehlenn.