Reverende domine, amice pl. observande.

CUM post longam peregrinationem superiori æstate patriam et amicos reviserem, multi viri docti, qvis Germaniæ, Daniæ, et vicinorum regnorum status esset, diligenter ex me qvæsiverunt, inter qvos Johannes Cragius magni apud nostrates nominis astronomus, qvia magnam ætatis partem in Germania consumpserat, qvi nunc ibidem in mathesi excellerent vehementer scire avebat. Cum ego cum multis aliis Tychonem Brahe etiam nominassem, statim ille: fastuosus homo ille, qvi multa profert, sed pavca probat, qvia mecum aliqvando in lite qvadam philosophica minus pro arbitrio certasset, gravissimam de me ad Scotiæ regem qverelam detulit, et non ita pridem, inqvit, ab ipso epistolas nonnullas æditas ajunt, in qvibus me sine nomine acriter perstrinxit, sed nullam inde lavdem reportabit. Proinde isto fumi venditore relicto, dic, ait, anne alios in Dania nosti astronomos insignes. Ego honorificam tui, ut debui, mentionem feci, et post varios de humanitate tua sermones magnetis tui memini. Is qvia se multa de hoc lapide scire existimabat, amicitiam contrahere, et qvicqvid singulare in mathesi experientia didicisset, tecum communicare desiderabat. Certior a me de naturæ tuæ bonitate et exqvisita eruditione factus, literas meis inclusas ad te misit; qvod serius venerint, effecit turbulentus Svediæ status, qvo ego præcipiti avtumno delatus fui. Qvæso nunc boni consule; adiunctæ sunt etiam aliæ ad Tychonem, si possis efficere, ut ad ipsum perferantur, cures rogo. Sin minus, ad me remitte; aperire, si placet, poteris meo periculo; hanc mihi potestatem dedit Cragius. Si cras ad me rescripseris, avt ipse ad te veniam avt Svediæ meumque statum ad te perscribam, jam avriga properabat. Navigandi Gedanum occasionem hic expectare cogor.