SCRIPSI Mag:iæ T:æ non ita dudum nonnulla de statu mearum rerum et simul eam rogaui, ut ab ampliss:o senatu Lubecensi sua intercessione et authoritate impetrare non degrauaretur, quo ea, quæ etiamnum ex mea supellectile isthic residua sunt, eorum iussu et provisione Hamburgum per flu[u]iolum interlabentem, mature deportentur, idque in gratiam s:æ cæs:æ m:tis, d:ni nostri clementissimi, cuj hoc officium gratiose placiturum. Spero itaque M:am T:am id ipsum executioni aut iam mandasse aut breuj mandaturam, quare nihil ulterius hac de re nunc repetam, ne videar de M:æ T:æ erga me beneuolentia, diu multumque mihi satis perspecta, quidpiam hæsitare.

Verum aliud quid maioris momentj nunc addam. Repetij, vtj scit M: T:a, totam pecuniæ summam ab jllustrissimorum juniorum principum Megapolitanorum quæstore, quam illis mutuo dederam et quidem legitimo tempore, prout literæ contractus habent, repetij. Verum is nunc prætendens ærarij vacuitatem summam promissam ac interesse ad tempus calendarum aprilis præfinitarum numerare tergiuersatur, aliter quam ab jll:mo duce Vldarico, d:no meo clementiss., constitutum illique iniunctum est. Cumque hæc procrastinatio mihi sit intolerabilis, siquidem in vltimis huius regni comitiis mense februario proxime elapso celebratis quibusdam præcipuis viris decem illa millia joachimicorum addixerim, atque inde plus commodj sperem quam prius obtinui, oportet utique me promissis stare et fidem datam redimere, nec etiam mihi integrum est interesse illo diutius carere, satis graue fuit, quod alterius anni usum fructum nunc primum per dd. Gödelmannum receperim. Scripsi itaque ad jllustrissimum ducem Vldaricum hac de re submisse et diligenter, vt ipsius cel:do dignetur sua authoritate efficere, quo mihi eueniat, id quod æquitas postulat. Quocirca M:am T:am magnopere rogatam habeo, ut apud ipsius c:nem negotium hoc promouere velit. Si quid fuerit quod apud s:am cæs:am, m:tem, d:num nostrum clementiss:m, in hac aula ipsius cel:tudini gratum præstare potuero, offero omni debita reuerentia et obsequio meam opellam quam fidelissime, quam etiam eodem modo inclytæ ciuitati Lubecensi officiosissime defero, quod et vtrisque T:a M:a meo nomine annuntiare velit. Quin et si qua in re M:æ T:æ vsui vnquam esse potuero, utatur me tanquam amico integro et constante, eius desiderijs, quantum in ipso est, non defuturo.