DURCHLÄUCHTIGSTER hochgeborner fürst, gnedigster herr. Ewer Furstl: G: sein meine vnterthenigste gantzwillige dienste iederzeit höchstes fleißes bevor.

Vndt soll deroselben vntherthenigst nitt pergenn, daß ich aine von meinen vielgeliepten töchtern mit nahmen Elizabet Brahe ainem westpfhälischen edelman Franzen Tengnagel zum Campe ehelich versprochen, auch nechst göttlicher hülff zwischen ostern vndt pfhingsten nechstkünfftich ihre hochzeit zu macchen vorhabens bin. Vndt dieweil nit allein die röm: kayß: may:, vnsern allergnedichsten herrn, ich allervnterthenigst sampt etzlichen deroselben vornehmen vndt hochweißen rhätten, sondern auch etzliche fürsten in Deutschlandt, baid eccleßastici vndt politici status, welche ich weiß, mir in gnaden bewogen zu sein, dazue zu beruffen in willens, hab auch solliches Ewer F: G: alß meinem iederzeit gnedichsten fürsten vndt herrn gehorsambst zu verstendigen vnd sie darauff zu laden nitt vmbgehen können. Nitt daß ich begehren kan oder darff, daß weder die andre fürsten noch E: F: G: ainen von denseinigen sölliche aine weitte reiße anhero schicken solte, sondern ihm fahll etwa dieselbe ainigen von ihren leutten alhie ahm hoffe hetten, daß von E: F: G: wegen der alsdan diesen nuptialem actum sua præsentia cohonestieren möchte.

Woran nur zum hohen ahngenehmen vnd gnedichsten gefallen geschehe, vnd bins meinem geringen vermög nach stets vnterthenigst vndt danckparlich zu erkennen gantz willig vnd gefließen. E: F: G: sampt dero vielgeliepten gemählin göttlicher allmacht abermahl vnterthenigst vnd getreulich empfhelendt.