Salutacione dilectionis et amicicie sincere premissa ♦ Leuen sundergen vrunde ♦ Wy begheren iw to wetende dat de vrowe koninginne van Denemarken vns enen breff gesant heft dar inne se mangh anderen worden rorede van deme schichte dat nů to somere in der zee schach van den iuwen vnd den vnsen vnd schreff vns van eneme dage den de irluchtige vorste. koning Erik van Denemarken vnde sin r{ae}d geramet hadde vppe den sondagh trinitatis to Kalmern to holdende vmme desser vorscreuen sake vnde vmme andere doend darsulues to sprekende ♦ Ok vorneme wy wol vte deme suluen breue dat se iw van dessen saken gescreuen heft ♦ Vnde se was van vns begherende dat wy dat anderen steden vnbeden scholden de mit vns to deme suluen dage to bringende ♦ Des hebbe wy {ee}r vor {ee}n antwerde gescreuen alse de copie inne holt hiir inne besloten ♦ Iw vruntliken biddende dat gi vns vnbeden by dessen iegenwardigen boden iuwe gutdunkent in dessen saken vnde wes gy {ee}r dar vpp vor {ee}n antwerde vnboden hebben ♦ Dar bewise gi vns vruntliken willen ane ♦ Scriptum feria ii^a post octauam epyphanie nostro sub secreto

Consules ciuitatis Lubicensis.