Eynfeldige befelunge etcetera ♦ Allirdurchluchster furste grosmechtiger gnediger herre ♦ Uff euwirn briff vns lecczt gesant von des landes wegen Gotlandt vnd der stad Wysbu vnd dornoch uff vnsirn briff gesant an vnsir frauwe dy konigynne czu Denemark mit inhaldunge euwirs briefes sy czu vnderrichten euwir grosmechtikeit meynunge dy selbe vnsir frauwe widder an vns hatt geschriben vorderlich ire meynunge vnd keyn recht czu vorsprechinde ader wo das gescheen sall das vsdruckt sy in erem briefe nicht den wir hirinne euwir grosmechtikeit senden/ ♦ Vnd wen euwir allirdurchluchtikeit in euwirm letczten briefe czu vns sich dirbeut das wir euwir grosmechtikeit macht hetten czu dem rechte czu dirbyten vnd nicht dy wyse wo vnd vor weme vns nicht fugete euwir grosmechtikeit rechtste<i>lig czu machen ader imand dovon czu schriben sunder nv euwir allirdurchluchste wysheit vornemen mag vnsir frauwen meynunge der koniginne so thut das von euch selbin wo vnd vor weme ir an das recht geen wellet mit ir vnd vortret vns ernstlichin wenn sy vns dorumb ernstlich schribt vnd vordert das vorgenante land vnd stad von vns schribinde vnd entbytende das das landt mit rechte ir czugehort vnd irem ryche ♦ Ouch so schribt gnediger herre vns euwirn wysen rat wy wir vns dorinne halden sollen doran wir euwir allirdurchluchtikeit geuallen mogen vnd genug syn/ vnd ouch doby keyns thun das vns mochte vorkart werden als eyn vnrecht von imandes/ wenn wir alle ding doran gethan habin nicht alleyne czu sunderlichim sunder eyme gemeynen vromen der lande vnd des kowfmans ♦ Das sehet an vnd vorsteet vns ernstlichin noch euwir briefe luet/ ♦ Off vnsirn briff mit dem ingeslossen bete wir vns eyne vnvorczogliche antwert/ wenn wir dy vorheissen habin obir czu senden mit vnsirm bothen uff dese ostern ader dornoch kurczlichin ♦ Datum ut supra in precedenti littera regine/