© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
MEIN freundlichenn grueß mit wunschung alles guthen zuuor, ehrnuester vnndt achtbar, gunstiger herr renttmeister, besonder guter freundt. Jch kann euch freundtlich nicht bergenn, welchergestalt mir meine elteste tochter anhero zugeschriebenn vnnd zuuernemen gegebenn, daß sie ahnn euch schreibenn vnnd vonn denn baldt betagtenn zinßenn ein zwey hundert taller auffnehmenn lassenn wolte, zweiffell derowegenn nicht, denn das solches beschehenn sein werde, vnnd jhr dargegenn gedachter meiner tochter handtschrifft zuhandenn empfangenn habenn, welche eben souill gelttenn alß wann jchs selbst gethan hette, sollenn auch hernechst wider geburlich gekurtzet werdenn. Jch habe vor etzlichenn wochenn einen eigenen bottenn inn Dennemarckenn abgeferttiget, der meinung, daß mir etzlich geldt von meinen doselbst noch außstehendenn haubtsummen vbersendet werdenn solte. Dieweil es aber itzo vielleicht der winter oder anders was verhindert, kann jch nicht wißenn, wie balt jch dasselbe geldt vberkommenn könne, vnndt jch gleichwoll itziger zeit inn diesenn frembdenn örternn geldes wolbenöttiget, sintemalln jch mich mit denn meinen inn die zwölff personnen starck vnndt souil pferde inn die funff wochen zu Dreßdenn aufgehaltenn, zugeschweigen was mir sonsten auf dem wege gekostet, worvber mein zehrgeldt, welchs jch zur Pragischen reise mitgenommen, aussgangenn, alß ist derowegenn ahn euch mein freundliches bittenn, jhr wollenn mir die freundtschafft beweisenn,vnndt noch zwey hundert thaller mit diesenn wittembergischen fuhrmann Dauidt gegenn vberantworttung meiner quitantz, welche jch ihme zu handen zugestellet, vberschickenn, vnndt jhme dieselbenn, wenn ehr vonn Rostock wider zu ruck auf Gustrow kumpt, empfangenn lassenn, daß ihr es mitlerzeit alda bestellen wollet.
Die victualienn, welche jch vonn euch empfangenn, belangend, bitte jch mir vnschwer zuerke[nnen] zugebenn, was sie kostenn, sollenn in den zinßen nichtweniger auch abgezogenn vnnd gerechnet werdenn. Jnn diesenn erzeiget ihr mir ahnitzo einen sonderlichenn angenehmen dienst, vnndt jch bin es vmb euch mit wunschung eines glucksehligenn neuwen jahrs jedertzeit hinwider zubeschuldenn geflissenn vnnd bereitwillig, vnndt thue euch göttlicher almacht befehlenn.