15990820001

1599. 20. august n.s. Brandýs

Tycho Brahe til Christen Sørensen Longomontanus

A København, Rigsarkivet, Langebeks diplomatarium. Afskrift

Tychonis Brahei et ad eum doctorum virorum epistolae ab anno 1588, ed. F.R. Friis, 1900Tychonis Brahe Dani Opera Omnia, ed. I.L.E. Dreyer, Tom. VIII, Hauniæ 1925, p. 158-159

TYCHO BRAHE AD CHRISTIANUM LONGOMONTANUM.

INVENI peculiari Dei providentia et dono Cæsarem hunc RUDOLPHUM Secundum mei et eorum, quæ tracto, studiorum clementi favore amantissimum, qui satis liberaliter mihi et meis hanc ob rem prospicere non est tergiversatus, veluti alias, Deo volente, ipsius Cæsareæ Maiestatis erga me benignissimam voluntatem, ubi adfueris, intelliges. Introductus quidem sum, statim ac Pragam veneram, etiam antequam audientiam apud Cæsaream Maiestatem habueram, in ædes Curtianas splendide et magnifice exstructas. Verum cum præviderem, me isthic in urbe, ob aulam tam amplam et hominum omnis generis maximam copiam, otio philosophico vix perfrui posse, exoptavi potius extra illam seorsim habitare. Quo intellecto ipsius Cæsarea Maiestas postmodum tres eximias arces, unius vel etiam dimidij diei itinere Praga distantes, per quendam nobilem virum, mihi ut eo deduceret adiunctum, monstrari curavit, ut ex ijs eam, quæ meæ intentioni commodior videretur, eligerem. Quarum una est Brandisium (ubi hæc scribo) verum quia cæteris nonnihil declivior, et propriæ Cæsaris delectationi, præsertim ubi venationibus indulget, destinata, hîc habitare non visum opportunum. Reliquæ duæ appellantur Lyssa et Benachia, ambæ etiam splendidissimæ et iucundissimæ arces. Inter quas Benachiam (quæ Venetiæ Bohemorum ob amœnitatem interpretatur) prætuli, quo unâ cum omnibus meis hodie vel cras, quod Deus fortunatum velit, introducturus est hic Capitaneus Brandeisensis, ex Cæsaris mandato ea de causa heri Pragam ad me evocatus. Est locus editus, ut undique libere pateat Horizon, Ædificia splendida et commoda; prope est parva civitas ad fluviolum Eifer in Albim excurrentem sita, ipsique Arci quasi contigua. Distat Praga 5 militaribus, via existente plana, ut iter saltem sit 6 horarum. Hîc favente divina clementia, cum meis habitare constitui, donec de feudo, quod Cæsarea Maiestas mihi pro me et mea familia posterisque clementissime addixit, alicubi per occasionem prospectum fuerit. Interim domum etiam opportunam Pragæ ipsius Cæsarea Maiestas mihi clementer concedere vult, quam, quoties eo excurrero, cum meis inhabitem, ut commodius degere et propria quadra vivere possimus, etc.

Datæ festinanter in transcursu Brundisio, dum Benachiam petimus, die 20. Aug. stylo novo An. 1599.

Tuus TYCHO BRAHE,
manu propria.