© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
ILLUSTRIS ET GENEROSE VIR, DOMINE ET AMICE HONORANDISSIME.
MAGNO equidem gaudio affectus sum, cum heri vesperi ex meis Domesticis huc Pragâ revertentibus percepissem Illustr. Generos. Tuam ex Austriâ nuper salvam et incolumem redijsse. Quo nomine non saltem Illustri Generositati Tuæ, sed et mihi ipsi quamplurimum congratulor, siquidem de Generositatis Tuæ erga me et ea, quæ tracto studia Astronomica, sincera et benevola affectione vel ex pauculo, quem superiori æstate invicem habuimus congressu, ita mihi optima quæque polliceor, ut in tanti viri, qui non saltem Genere clarus sit, sed et doctrinis liberalibus insigniter excultus, familiaritatem incidisse, non postremæ felicitatis loco ducam. Cumque nunc Pragam Nobilem et Eruditum adolescentem FRANCISCUM TENGNAGLIUM, mihi domesticum, qui ante paucas hebdomadas ex Italia huc reversus est, unâ cum filio meo natu maiore ex me denominato certis de caussis amandem, non potui intermittere, quin hasce pro felici reditu candido animo Illust. G. T. congratulantes unâ mitterem, atque ijs simul iniungerem, ut Tuam Illust. Generos. captata oportunitate accedentes eam ex me officiosissime salutarent. Pergratum vero est, quod Illustris Dominatio Tua Excellentem Mathematicum Dominum Μ. IOHANNEM KEPLERUM in suo Comitatu huc ad nos in Bohemiam adduxerit, qua etiam in parte non obscure elucet Illust. G. T. erga sublimia illa et a vulgi captu remota Mathematum studia eorumque alumnos singularis et nunquam satis laudatus favor atque benignitas ab omnibus hisce excellentioribus Scientijs addictis merito semper deprædicanda. Intercessit mihi cum illo viro, postquam Daniâ emigravi, nonnulla per Litteras eademque pergrata familiaritas, quæ ex mutua præsentia, quam brevi futuram mihi persuadeo, augeri poterit. Quicquid vero voluptatis et commodi ex hoc nostro congressu promanare poterit, Illustri Dominationi Tuæ præcipua ex parte acceptum ferendum grata mente agnosco. Pluribus Illust. Generos. T. multiplicibus alias pariterque gravissimis occupationibus distentam remorari nolo. Cætera, quæ hîc omitto, ij, quos ablego, si Illust. Domni Tuæ eos admittere commodum fuerit, supplebunt atque ex me referent; quibus ut benignam aurem pro solita sua humanitate præbere non dedignetur, qua possum reverentia, oro et obsecro. Valeat Tua Illust. Generositas quam felicissime et diutissime, huncque noviter inchoatum Annum Iubilæum plurimosque alios insequentes incolumis et florens transigat.