16000501001

1600. 1. maj.1600. 1 May. Frankfurt am Main

Jaques Bongars til Tycho Brahe

A Basel, Universitätsbibliothek Basel, G I 23.

Tychonis Brahe Dani Opera Omnia, ed. I.L.E. Dreyer, Tom. VIII, Hauniæ 1925, p. 318

NOBILISSIMO ET AMPLISSIMO VIRO, DOMINO TICHONI BRAHE, VIRO INCOMPARABILE IN ARCE CÆSAREA BENATICA.

NOBILISSIME ET AMPLISSIME DOMINE.

TRES iam septimanæ abierunt, ex quo redditæ mihi sunt litteræ, quas ad me dedisti IX Martij. Sed neque eas accepi, quas memoras datas sub finem anni superioris, neque FRANCISCUM TENGNAGLIUM vidi, quem a te tanto viro commendatum, omnibus fuissem officijs prosecutus. Non gravaberis itaque repetere, et quæ illis litteris erant explicata, et quæ huius fidei commiseras. Me certe, magno tuo merito, habebis ad omnia, quæ quidem erunt meæ potestatis, semper paratissimum. Nec addo plura: mandata tua expecto cupide. Tuas in posterum ad me tuto poteris committere bibliopolæ ei, qui CLAUDIJ MARNIJ Wecheliani officinæ præest Pragæ.

Vir Nobiliss. Deus te servet incolumem.

Francofurto ipsis Kal. Maijs 1600.

Nominis tui studiosissimus
BONGARSIUS.