© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
DURCHLAUCHTIGSTER hochgeborner furst, gnedigster herr. Ewer Furstl: Gnaden sein meine vnterthenigste, gantzwillige dienste iederzeit hochstes fleißes beuor. Vndt seitenmahl ich itzo ainen aigenen potten inn Dennemarck abgehen laße, hab E: Furstl: Gnaden ich mit dießem meinem geringen schreiben in vnterthenigkait zu ersuchen vnd deroselben vor die vielfaltige mir bezaigte gut vndt wohlthatten zu dancken nitt vmbgehen könnenn.
Waß dan meinem itzigen zustandt betrifft, werden E: Furstl: Gnaden denselben vnlangst auß mainem vorigen schreiben vmbstendiglichen vernomen habenn, darumb hie ferner zu wiederholen vnuonnötten. Dan ihre rom: key: may:, mein allergnedigster herr, nochmahlß (wie vor, ie lenger ie mer) mir mit allen keyßerlichen gnaden (Gott lob) gewogen, vndt haben erst neulich deß gewesen reichs vice-cancellarij Jacobj Curtij l. m. ansehenliche vndt statliche behausung, so ahn ainen hohen ortt eußerst an der königlichen hauptstadt Prag gelegen, vmb zehentausendt thaller zu meinem vnd deß studij astronomicj nutz mildtlichen kauffen laßen, wo alle meine jnstrumenta so ain zeitlang in jhr kay: maytt: lustgarten nahe beim schloß gestanden, itzo conuenientj modo disponirt, auch ain laboratorium pro spagyricis exercitijs angerichtet wirt.
Ferner kan E: Furstl: Gnaden ich vnterthenigst nit verhalten (wie dieselben auch noch gnedigst werden wißen zu entsinen), daß vor ainem halben jahr die summa von zehentausendt reichsthallern, so der jungen herschafft zu Mechlenburgk von mir gutwillig vorgestrecht, deroselben rentmeistern Andreß Meiern durch meinen vettern vndt volmechtigen derer örter Eske Bilden auffkundigen laßen, dan ich dießer örter landtgütter eingekaufft, zu welcher entrichtung ich darzue vervrsacht worden, worein dan E: Furstl: Gnaden damahlß (immaßen sölliches der pilligkeit gemeß) sich gantz gnedigst vndt willfharlich erzaigt, jch auch alhie die leutte darauff vertröstet habe. Anietzo aber werde ich von herrn doctore Gödellman, welchem ich die zehentausendt thaller hauptsumma sampt dem interesse meinentwegen einzuenehmen volnkomblich commisson gegeben, glaubwürdig berichtet, daß obgedachter rentmeister nitt allein in der summen, sondern auch deß schon verschienen interesse erstattung weigerlich befunden werde vndt andere große außgaben furwende.
Dieweiln dan E: Furstl: Gnaden alß hochstgedachter jungen herschafft vormund darin gnedichst gewilfharet, sollichs auch ann ihme selbs pillich vndt ich andern leutten darauff zuegesagt, alß gelanget an E: Furstl: Gnaden mein vntherthenigste gantz fleißige pitt, sie wollen nit geschehen laßen, daß meine wort zue nichte gemacht vndt ich dadurch an meinem biß dato wohllhergebrachten nahmen vnd glimff abbruch erleiden, sondern mehrgedachte summa vndt interesse furderlichst, wofern sölliches vber hoffnung noch nitt geschehen, anhero vberkommen muege. Sölliches vmb E. Furstl. Gnaden (wozue dan dero gnedigsten thats ich mich vnterthenig getroste) eußerste mueglicheit gehorsambst zuverdienen, erkenne ich mich stetz schuldig vnd geflißen.
Thue hiemit E: Furstl: Gnaden sampt dero vielgeliebten gemahlen zu glucklicher langwehrender regierung vndt zue deren ferneren furstlichen gnaden mich vnterthenigst vndt getreulich entpfhelen.