© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
MEINE freundtwillige dienste zuvorn. Ehrnuester, achtpar, lieber herr rentmaister, insonders gueter freundt. Ewer schreibent von Wißmar, den 18. maij dieses lauffenden jhars datiert, ist mir wohl behendiget, aber das vorige, wovon ihr meldet, so wegen der fürgewandten verhindernuß dero 10000 thaller hauptsummen vnd zinsen erlegung ahn mich ergangen sein soll, hab ich bis dato nitt gesehen, geschweig die darinnen angezogene vrsacchen für erheblich ahnnehmen können. Vnd seitenmahl obgedachte summa zu rechter zeit vnsers hieruber auffgerichteten contracts auffgekündiget, vnd ihr auch (wie dan ahn ihm selbs pillich) dieselbigen ahngenohmen, hab ich die anderen leutten zugesagt vnd versprocchen, dan mir ohnedas vnleidlich, die zinse nitt zu rechter vnd gepüerlicher zeit zue entpfhangen, wie dan auch dieselbige von Rostogk anhero zu bringen kain mittel noch rhat weiß. Zu deme auch hatt mein blutsverwanter Esche Bilde meinentwegen ain thail deßelbigen geldes anderen leutten versprocchen, vnd wollen noch können ewerer ex postfacto angereugter vrsacchen halben vnser wort nitt wiedernehmen. Gelanget derowegen ahn euch mein abermähliges, ernstliches pitten vnd begehren, das ihr nochmahls dazu thuen wollen, damit mir ohne ainigen weittern verzugk zum allerlengsten innerhalb nechstkünfftigen s. Joannis thagk, wie ihr offtgedachtem Esche Bilden zuegeschrieben, mehrgedachte hauptsumma sampt dem interesse richtich erlegt werde.
Hieran thuet ihr was der pilligkait vnd meiner aigentlichen resolution gemeß, jhm fal ihr nit wollet, das ich die bürgen in schaden zue bringen, vnd bej jhr: f: g: hertzogk Vldricchen, meinem gnedichsten fürsten vnd herren, micch derentwegen zue beklagen verursaccht vnd genotdrenget werde.
Söllichs hinwiederumb auff zu tragendem fall vmb euch vnd die ewerige zu verschülden, bin ich iederzeit willig vnd geflißen. Euch hiemit göttlicher almacht entpfhelendt.