© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
MEINEN freundtlichen grueß sampt wünschung alles gueten iederzeit bevor. Ehrnuester achtpar, insonders gönstiger lieber her rentmeister. Was sider der auffkündigung dero 10000 thaller hauptsummæ sampt dem interesse, damit jj: ff: gg: die junge herschafft zue Mecklenburgk mir verhafftet, vorgelauffen vnd was vngelegenheit mir auß verzugerung der zahlung (welcher termin (meiner auffkündigung nach) verfloßen gewesen den 1. aprilis dieses lauffenden jhars) entstanden, werdet ihr euch auß meinen hiebevor ahn euch ergangenen schreiben nochmahls zur genüege wißen zue entsinn[en]. Dieweiln dan ihr abermahl gegen gleichßfals verlauffenen s. Joannis thagk obangereugte summa vnd interesse richtich zu erlegen erpotten, hab ichs dabej, wiewohl ich dadurch in keinen geringen schaden gerhaten, j: f: g: hertzog Vldrichen etc., meinem gnedichsten herren, zue vnterthenigsten gefallen (wiewohl die bürgern laut vnseres contracts einzuemahnen ich guete vnd pilliche vrsacch gehabt) biß dato beruhen laßen. Vnd nehme mir in kainen zweiffel, ihr werdet nuhnmehr (seitenmahl lenger mitt dem gelde zue warten ich durchauß nitt kan oder bedacht bin) auff die mittel vnd wege gedacht, auch dazu gethon haben, das mehrgenante hauptsumma vnd interesse nuhnmæhr richtich verhanden vnd strax par außgezehlt werden solle vnd könne. Jnmittelst sehe ich gerne, das es bej ainem gewißen man zu Hamburgk oder Lübeck, bis es abgeholet wirt, auffgehoben oder verwahrt würde. Wie dan alßpaldt aine gewiße pottschafft ich derer orter zu senden daßselbige geldt abzuholen bedacht bin. Vnd hab mit zaigern dieses euch söllichs zuvor zu verstendigen, damit er alßpaldt damit gefürdert vnd nitt auffgehalten werde (worauß dan vns baiderseits, so wohl auch den bürgen, allerhande vngelegenheit entstehen würde), vor guet angesehen. Vns hiemit götlicher almacht entpfhelendt.