© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
MEINEN freundtlichen gruß zuuorn. Freundtlicher lieber rentemester. Kan ich euch freundtlich nicht vorhaldten, daß mihr heudt dato ein schreiben ist behendiget worden, so mihr Berendt Ferste, burger zum Kil, zugesendet hadtt, vndt dieweiln dar kein namen eingeschrieben war, hadt mich doch der briefzeuger berichtet, daß daßelbige brieff von euch keme, vnndt waß dießelbige anlanget, daß ich soldte habenn zu Dobbran, in deß f: g: vorgemack, anlangen laßenn vmme 2000 thaler vnnd derselbige, so dermasßen meinendtwegen hadt angelanget, kein quitung nicht gebragt, so weiß ich nicht von sölche quitung odder 2000 thaler zusagen, habe auch darumme nicht anlangen lasßen, söndern ihr wisßet euch wol zuerinneren, daß ich vor lengst die 10000 thaler, worauff ich ein furstliche obligation habe, habe auffkundigen lasßenn vnndt auff die bestimbte zeidt, alß nemlich auff ostern, mein diener midt des f: obligation hinaußgesenndt daß geldt zu entfhangen, vnndt weiln erß nicht bekhommen hadtt, vndt ihr mich zugeschriebenn, daß eß auff Johannj soldte erlegtt werden, alß habe ich zum vberfluß widderumme mein diener abgefertigtt midt deß f: obligation, vnnd hadt er itzliche thage fur vndt nach Johannj zu Rostock in Joachim Lorman sein hauß gewardtet, vndt weiln daß geldt in d: Lucas Beckmester sein huß zuerlegen auffgekundigt war, hadt erß dem h: doctor wisßen laßen, wohr er zu finden war, ob dar wen kheme, der solche summa außzelen woldte, seindt doch keine nicht gekommen, hadt sich derhalben widderumme nach heim begeben, vnnd weiln ihr schrieben, daß die summa fur Johannj al beisamen ist gewesen, vndt nuhr die entfhenger wardten, so wil ich noch zum dritten mall selbst pershonlich hinaußkommen, vnndt ihr werdet mihr nicht vordenckenn, wo ferne die summa neben all jnterres vnd skaden nicht erlegt wirdt, daß ich dan andre mittel gebrauchen werde. Habe auch diß zum f[reun]dtlich andtwordt nicht vorhaldten khonn[en]. Vnndt thue vnß beiderzeidtz in den schudtz deß Almegtigen empfhelen.