Vruntlike grote und wes ik gudes vormach.

Wetet, leven vrundes, dat ik juwen bref wol vornomen hebbe, alse juwe vorsichticheit mi to schreff, dat de van Revale mines heren koninges gnaden und sinen undersaten ninen vordreit edder schaden gedan hebben, ane dat der stede bod is.

Des hopet mi to Gode und to ju, dat gi dat selven wol derkennen konnen, dat mines heren gnade van den steden und copmanne anders nicht vormodende is, men leve vruntschopp.

Ok hebben se nin ofverbod ofver mines heren undersaten to richtende, ane mines heren vulbord.

Ok en hebben de stede edder de van Revale nine vorwarninge gedan edder vorboed gesant an mines heren amptlude, stede edder undersaten, dat se sik vor jenich bod hoeden solden.

Men allent dat en geschein is, dat is en wederfaren in der tosokinge in leive und in der vruntschopp, alse se van oldinges bewone weren.

Item alse gi schriven, dat et mines heren amptluden, steden edder undersaten to ninem vordreite edder schaden gedaen is, sunder in dat meine beste, dat beste bekenne God.

Ok kunne gi dat sulven wol derkennen, welkerleie wiis mines heren undersaten dat beste to dreven is, und ik besorge mi des, alse ik juwer erbarheit er to schreven hebbe, wu de rad van Revale sik noch nicht sulven richten, edder gi se dar ane vullenkomeliken edder leifliken underwisen willen, dat dat beste wert in groter clage komen vor mines heren gnade, vor andere heren und stede.

Vorder mer kan ju desse erber man, her Johan van me Holte, ratman to Revale, alle dink berichten, wes he hiir gehort heft van clage der undersaten mines heren.

Hiir van begere ik van juwer erbarheit een lefliik und een endich antworde.

Gode almechtich blivet bevolen to ewigen tiiden.

Gescreven to Wiborch, des vridages na Pinxsten.

Bi mi Kersten Niclisson, ritter.