Devotis in Christo sibi dilectis Thorkillo Thorkilsson cum consorte sua Sigrid Audens dotter ffrater Olauus ordinis predicatorum provincie Dacie prior provincialis salutem et augmentum continuum celestium graciarum. Continue vestre ut audivi erga fratres nostri ordinis devocionis affeccione et illius usque in finem perdurante favorabili continuacione vestro satisfacere cupiens desiderio vobis omnium missarum oracionum predicacionum vigiliarum jejuniorum abstinenciarum laborum ceterorumque bonorum que per fratres nostre provincie videlicet regnorum Norwegie Swecie ac Dacie fieri donaverit copiosa clemencia salvatoris participacionem tenore presencium concedo specialem ut multiplici suffragiorum presidio et hic augmentum gracie et in futuro nostre omnium vite eterne premium possidere. Volo insuper et ordino ut anime vestre post decessum vestrum fratrum tocius provincie suffragiis et oracionibus recommendentur in nostro provinciali capitulo cum vester obitus eidem fuerit nunciatus. In cujus concessionis testimonium sigillum nostrum presentibus est appensum. Datum in parochia Slydræ anno domini mcdxxx iij^o ipso die beati Bartholomei apostoli gloriosi.