Abbati monasterii Tute vallis Ripensis diocesis et Burglanensis ac Westerwicensis Burglanensis diocesis ecclesiarum prepositis.

Humilibus supplicum votis (libenter annuimus, illaque favoribus prosequimur oportunis).

Exhibita siquidem nobis nuper pro parte Martini Sparck prepositi et capituli ac Eggardi canonici ecclesie Vibergensis ordinis s. Augustini petitio continebat, quod olim Hermannus episcopus Vibergensis, nulla subsistente causa rationabili, sed ex arrupto et de facto, dictum canonicum et nonnullos terrarum ejusdem capituli colonos excommunicationis sententia innodavit et fecit excommunicatos publice nuntiari, propter que prepositus, capitulum et canonicus predicti, sentientes exinde indebite se gravari, ad sedem apostolicam appellarunt nobisque supplicarunt, ut causam appellationis hujusmodi et negotii principalis aliquibus in partibus illis committere ipsosque canonicum et colonos ab eadem excommunicationis sententia ad cautelam absolvi mandare ... dignaremur.

Nos itaque discretioni vestre mandamus, quatenus, vocatis dicto episcopo necnon aliis, qui fuerint evocandi, canonico et colonis predictis, si hoc petierint, recepta prius ab ipsis cautione idonea super eo, quo excommunicati habentur, quod, si dictam excommunicationis sententiam in eos latam vobis constiterit fore justam, vestris et ecclesie mandatis parebunt, absolutionis beneficium ad cautelam ab excommunicationis sententia hujusmodi auctoritate nostra impendatis, prout de jure fuerit faciendum, super aliis vero, auditis hincinde propositis, quod justum fuerit, appellatione remota decernatis, facientes, quod decreveritis, per censuram ecclesiasticam firmiter observari.

Datum Florentie 18. kal. maji anno 6.