© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
DICERE non possum, Nobilissime et amantissime mi TYCHO, quanta voluptate me affeceris, non saltem eruditissimis literis, ad me nuper datis, sed et contemplatione tua vere Mathematica, de miraculosa illa ad Cassiopeiam stella, quæ ante paucas hebdomadas plane conspici desijt, quam ego quidem Cometam appellare solitus sum, secundum receptam ex ARISTOTELIS schola opinionem, licet ut fatear id, quod res postulat, propriæ meæ observationes, Quadrante illo maximo, ex tuo præscripto hîc fabrefacto, obtente convincant, id, quicquid erat iubaris, non infra Lunam fuisse, sed in altissimo æthere, siquidem nullæ proveniant parallaxes ex meis diligenter institutis observationibus, et tamen non ausus fui dicere, supra Lunam extitisse, ne contra Philosophum, cuius præcipua est autoritas, quippiam affirmarem, qui Cœlum nova non admittere corpora indubitanter statuit. Sed prævaleat autoritati experientia, præsertim cum tu accuratissimis tuis Instrumentis et Observationibus idem, quod ego, deprehenderis: nimirum nullam prorsus adfuisse huic φαινομένῳ parallaxin, veluti etiam satis evidenter in hoc tuo eruditissimo scripto demonstrasti, quod sane longe antecellit omnium aliorum hactenus de eadem stella in publicum editas conceptiones, ita ut vix cum hac conferri mereantur: et optarem quam maxime, me id prius obtinuisse, ut descriptum eius cum doctis hinc Mathematicis, cum duraret adhuc ea stella, præsertim MÆSTHLINO, qui idem tecum sentire videtur, licet non tam evidenter atque dilucide, sed per ambages quasdam demonstret, communicare potuissem. Sed spero, me plura exemplaria a te obtenturum, eademque, uti polliceri videris, auctiora reddita, tum demum alijs ea impertiar. Interea hoc meum, uti rem pretiosam, reservabo, et fratri meo atque WOLFIO nostro ostendam. Quamprimum igitur plura eiuscemodi publicaveris, me eorum facere participem ne supersedeas quæso. Adiunxi hisce observationes meas in hac ipsa stella, et quibusdam alijs, factas eodem Quadrante permagno, tuo instinctu hîc elaborato, quas examinare poteris, et tuam postea mihi de ijs indicare censuram. Plura nunc scribere non vacat, ob negotiorum molem in hoc officio, quod sustineo, publico. Tu itaque vale, optime mi TYCHO, et sæpius me tuis eruditis literis invisere ne omittas.