© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
ERENUESTE, achtbare, wolweise, erbare, jnsondere gunstige herrnn vnnd gutte freund, denselbenn sein mein gantz geflissene jederzeitt willige dienst möglichem vleiß nach zuuor. Vnnd kan E.E. vnnd W.W. freindtlicher meinung zuuerstehenn gebenn jch nit vnterlassenn, das, nachdem ich ein gantzes jar nahe bey ewer hoch- vnd weitberumpten stadtt Hamburg auf dem Rantzouischenn hauß Wandesbeck, wie E.E. vnd W.W. bewust, gewonet, von jhrer röm: kay: mt:, vnserem allergnedigstenn herrn zum andernmal an den kaiserlichenn hoff von Wittenberg ab jch bin allergnedigst erfordert wordenn, vnnd, als jch alda meiner gelegenheitt nach gehorsamlich compariret, allen kaiserlichenn gnedigenn willenn vnd bewogenheitt vntertäniglichenn gespuret vnnd mit allermildesten prouision allergnedigst versorget wordenn. Als aber jhre röm: kay: mt: vernommenn, das jch noch etzliche von meinenn astronomischenn instrumenten, die so groß wehrenn, das man sy nit auf der axs furenn könne, jm königreich Dennemarck, meinem liebenn vaterlandt, nebenn etzlichenn andern sachen hinderlassenn hett, jst jhr. röm: kay: mt: allergnedigst gesonnenn vnnd mir thun befehlenn, solches alles nebenn dem, so jch noch zu Magdenburg, alher jn jhr königreich Behmen fur dem winter furderlichst zuebringenn. Zue besserem fortgang aber dessenn hatt jhr. röm: kay: mt: ein schraibenn an E.E. vnd W.W., sowol an einen erbarn rath der stadt Magdenburg, mir allergnedigst hieuon zuestellen vnd an dieselbigen abgehenn lassenn, welches an E.E. vnd W.W., beynebenn jch denselbigenn thue zueschickenn, nit zweifelnde, E.E. vnd W.W. werdenn hierin jhr röm: kay: mt: gehorsamlichenn wilfahrenn vnd mit schiff, sowol anderer gelegenheit, wie es dan meine leutte anzeigenn werdenn, wan die sachenn auß Dennemarck alda ankommenn, zu prouidiren vnd furderlichenn sein, damit, ehe die Elb zufreuret, alles mag wol verwahret hierauf, so weitt als sy schifreich ist, gebracht werdenn. Hieran geschiet vnd thuenn E.E. vnd W.W. zuforderst jhr. röm: kay: mt:, vnserm allergnedigstenn herren, ein allergnedigstes sonders vnd angenehms wolgefallenn, auch mir vnd dem astronomischen werck, so jch vorhabe, gutte promotion, welche jch bey jhr. kay: mt: wil zuruhmenn wissenn, vnnd vmb E.E. vnd W.W., welche jch hiemit Gott jnn seinenn schüutz vnd schirm befohlenn habenn wil, hinwiderumb nach meinem vermögenn altzeit geflissenn sein zuuerdienen.