© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
ALLERDURCHLAUCHTIGSTER, großmechtigster römischer kayser auch zu Hungern vndt Beheimb königh, allergnedigster herr. Auff Ewer Kay: May: allergnedigstenn vnd zu vnterschiedtlichen mahlen ergangenen befehlich kan ich gleichwohl meine besoldung, so mir nue lenger alß ain jahr restiret, biß dato noch nicht bekommenn, welchs mihr sehr beschwerlich vorfelt vnndt nit wohll mueglichen lenger außzuestehen. Bitte darumb Ewer Kay: May: ich allervnterthenigst, die geruhen allergnedigft zuuerordnen, daß mihr baide die restirende vndt kunfftige besoldung auß Ewer Key: May: herschafften alhie ihn Behemen (wo es dan Ewer Kay: May: allergnedigst gefallig) geraichet, vndt alle quatember richtig gemacht werden möge, auff das ich die guette zeit mit vergeblichen sollicitationibus nebenst großen schaden vndt bekummernußenn (wie bißhero leider geschen) nit lenger zuebringe.
Waß andere mangel betreffendt ihn den sachen, so von Ewer Kay: May: allergnedigst mir von anbegin vndt hernacher bewilliget sindt, aber noch nicht wiederfahren, hab ich dem herrn Baruitio ain kurz verzaichnuß davon vberliefert Ewer Kay: May: meinet wegen vnterthenigst vorzuetragen, vndt bin der genzlichen hoffnung, daß ich auff diß alles mit dem ehesten ein allergnedigste resolution bekommen werde, auff daß ich ainmahl aigentlich wißen möchte, wie ich alhie darahn wehre, vndt ob ich ainige faste vndt bestendige gelegenheit erlangen köntte, mein vorhabendes hohes studium vndt astronomisches wergk Ewer Röm: Kay: May: vnd dem reich zue sondern ruhm, nutz vnd ehren alhie vnterthenigst zuuohlzihen, oder vonnötten wehre andere bequemigkait darzue zue suchen. Ewer Röm: Kay: May: ihn allen vnterthenigstem gehorsamb zue dienen ich mich iederzeit ganz schuldig erkenne. Ewer Röm: Kay: May: allervnterthenigster gehorsambster diener