16000309002

1600. 9. marts n.s. Benatky

Tycho Brahe til anonymus

A Basel, Universitätsbibliothek Basel, cod. Basileensi G I 35.

Tychonis Brahe Dani Opera Omnia, ed. I.L.E. Dreyer, Tom. VIII, Hauniæ 1925, p. 261

TYCHO BRAHE AD ANONYMUM

GENEROSE AC MAGNIFICE VIR, DOMINE ET AMICE INPRIMIS HONORANDE.

CUM hic Nobilis et Eruditus Adolescens FRANCISCUS TENGNAGLIUS, quem tua M^a iam antea novit, nuper ex Italiâ huc in Bohemiam ad me reversus, in Patriam suam Parentum invisendorum gratiâ nunc cogitet, et in itinere aut reditu Ser^mum Electorem Coloniensem, Domimnum nostrum Clementissimum, denuo humillime accedere, nisi nimia viarum pericula id vetent, omninô constituerit: idcirco vacuum meis ad M^am tuam literis venire non sum passus, ex quo M^æ tuæ erga me humanissima officia gratâ mente etiamnum recolam, et perpetuo eorundem meminerim, paria relaturus, si vires sufficiant, is aut occasio ulla sese exhibeat. Licet vero quæ ad M^am tuam perscribam, præter ea, quæ is commodius et tutius oretenus exponet, non habeam, tamen M^am tuam hisce officiosissime salutare volui, utque dictum TENGNAGLIUM sibi quam commendatissimum habeat, et utriusque nostrûm negotia apud Ser^mum Principem, prout antea quoque perlubenter et benevole præstitit, promovere atque expeditionem maturam impetrare non gravetur. Cumque idem TENGNAGLIUS instar vivæ Epistolæ futurus sit, et tam me quam se ipsum concernentia M^æ tuæ plene et secreto indicaturus, ulteriore scriptione supersedeo, ac per eundem, quam primum fieri possit, favente Numine, ad me revertentem responsum expecto. Deus opt. max. M^am tuam Reip. et bonis literis quam diutissime prosperam et incolumem servet.

Dabantur ex Arce Cæsareâ Benaticâ, quam nunc unâ cum meis inhabito, die 9 Martij 1600

M^æ Tuæ studiosiss.
TYCHO BRAHE.