16000406001

1600. 6. april n.s. Benatky

Tycho Brahe til Johann Friedrich Hoffmann

A Wien, Österreichische Nationalbibliothek, cod. Vindob. lat. 10703, (transcript by Kepler).

Tychonis Brahe Dani Opera Omnia, ed. I.L.E. Dreyer, Tom. VIII, Hauniæ 1925, p. 297

ILLUSTRI ET GENEROSO DOMINO, DOMINO IOHANNI FRIDERICO HOFMANNO, LIBERO BARONI IN GRUENPUEHEL ET STRECHAU, PRÆFECTO PROVINCIÆ DUCATUS STYRIÆ ET ARCHIDUCATUS AUSTRIÆ, MARSCHALCHO UBIQUE HÆREDITARIO, BURGRAVIO IN STEYER, NEC NON SACRÆ CÆSAREÆ MAIESTATIS AULÆ CONSILIARIO ET SERENISSIMI ARCHIDUCIS MAXIMILIANI CUBICULARIO PRIMARIO, DOMINO ET AMICO SUO IMPRIMIS HONORANDO.

ILLUSTRIS ET GENEROSE VIR, DOMINE ET AMICE HONORANDISSIME.

REDIT nunc Pragam M. KEPLERUS, et licet suasor illi fuerim, ut domestici mei, qui etiamnum Pilsnæ est, et inter alia in negocio dictum KEPLERUM concernente sollicitat, reditum, quem intra paucos dies futurum spero, expectaret, ut quid fieri possit, certius resciremus (præsertim cum spes aliqua facta sit, Sa^am Cæs^am Ma^tem petitionibus meis humilimis clementissime annuere velle) atque demum aliquid rati concludere possemus: tamen cum ipsum nihilominus abitum festinare intelligerem, reliqui hominem suo arbitrio. Quid vero inter nos ventilatum sit, Ill^ris D^o Tua e D. Doctore IOANNE IESSENIO, qui has adfert, seorsim cognoscet: is enim interfuit, dum hæc gererentur: quare longiore et tædiosâ eorum commemoratione supersedeo, omnia ad hanc rem facientia Illustris D^nis Tuæ prudenti consilio dispicienda ordinandaque etiamnum relinquens.

Cœterum de puero, quem Illustris D^natio Tua ad me mittere decrevit, sciat me libenter eum, quandocunque advenerit, recepturum, tum quoque laboratorem Spagiricum. Et expecto pariter fabrum illum Mechanicum, qui e Styria venturus est. Quam primum vero per occupationes licuerit, spero me Pragæ futurum, ubi plenius cum Ill^ri D^one Tua de ijs, quæ hîc omissa sunt, agam.

Valeat Tua Ill^ris D^o quam optime et diutissime.

Dabantur ex arce Cæsarea Benatica die 6 Aprilis Anno 1600.

Ill^ri Generositati Tuæ
Addictissimus
TYCHO BRAHE,
manu propria.