© 2024 Det Danske Sprog- og Litteraturselskab. Copyright
Dansk Litteratur drives af Hugo v0.119.0
Hosting: Det Danske Sprog- og Litteraturselskab
DURCHLÄUCHTIGSTER hochgeborner fürst, gnedichster herr. E: Fürstl: Gnaden sein meine vnterthenigste gantzwillige dienste iederzeit höchstes fleißes bevor. Vndt mag deroselben abermahl auß hochdrengenden vndt erheblichen vrsachen vnterthenigst nit pergen, wie dan auch E: F: Gnaden zweiffelsohn sich nochmahls gnedigst werden wißen zu entsinnen, daß die summa von 10000 thaller hauptstuel sampt dem interesse, so der jungen herschafft zue Mechelburgk von mir gehorsambst vndt guttwillig vorstreckt, ich wegen meiner sonderbaren notturfft vndt ahnligens zu rechter zeit vnsers hierumb auffgerichteten contracts auffgekundiget. Worein dan Ewer F: G: (in maßen es der pilligkait gemeß) so paldt solchs deroselben gehorsambst vorgetragen, gahr kein bedencken gehabt, sondern dero rentmeistern Andreas Meiern ahn stundt die gnedigste ahnordenung gethan, obgemelte summam vndt interesse gegen vergangenen ostern ohne ainigen verzuegk inhabe[r]n meines brieffes richtig wiederumb zueerstatten. Worauff auch (seitemahl sollichs geldt von Rostoch gehn Prag zue bekommen mir bißanhero fast beschwerlich gefallen) ich eß zue meinem vndt den meinigen besten vndt frommen andern leutten alhie, zum theil auch mein blutsverwandter Esche Bilde anderßwo meinentwegen zuegesagt vndt versprochen.
Nun aber wirdt mir von gedachtem E: E: G: rentmeistern wieder meinen verhoffen zuegeschrieben, daß anderer außgeben halben sollichs geldt noch nicht erleget vndt bezahlt werden könne, welchs zwar mir, weiln E: F: G: gnedigster zuesag zufolge ich gegen vergangenen ostern mich mit andern deßwegen eingelaßen, schmertzlich vndt frembd vorkhumpt.
Gelanget derowegen ahn E: F: G: mein vnterthenigste gantz fleißige pitt, E: F: G: wollen nit gescheen laßen, daß mihr ahn meinem biß dato wohlhergebrachten nahmen etwaß abgehen, vndt ich wieder mein wort handeln muße, sondern der gnedigsten befehlich thuen, daß mir zum allerlengster innerhalb nechstkunfftigen s: Johannis tagk mehrgedachtes geldt ohne fernere verzugerung gefollget werden muege.
Hirahn erzaigen E: F: G: mir ein große gnadt, vndt ich binß meiner geringfügigen personen nach iederzeit in vnterthenigster danckparkeit zue erkennen gantzwillig vndt geflißen. Dieselben hiemit sampt dero vielgeliepter gemahlin zu langwahrender gluchklicher regierung göttlicher almacht gehorsambst vndt getreulich entpfhelendt.