Eynueldige beuelunge vnd willigen dinst czu aller koninclichin beheglichkeit beuor ♦ Allirdurchluchste forstynne vnd grosmechtige gnedige frouwe ♦ Euwern briffN vns leczten by euwerm bothen Mertyn Ienissone gesant haben wir wol vornomen hog gewegen vnd geacht das vns vnd vnsern orden euwir hochgeborne wirdikeit also besorget beteidinget vnd bewaret vnd vnser bestes fleissiclichin ramet als wir genczlich des hoffen vnd als euwir grosmechtige durchluchtikeit schreibt das wir welden geben by dem selben egenanten euwerm bothen noch ynhaldunge des selben brifes eyne enthaftige entwert so geruche euwir hochwirdikeit czu wissen das wir czu desser czit keyne enthaftige entwert euwern gnaden geben mogen durch nemlichir sache wille went wir vnsere boten als den voith von Roghusen vnsers ordens bruder vnd vnsern vnsern getruwenA Albrecht Rathen rathman von Thorun kurczlich noch Michalis nehest vorgangen haben gehat by koning Albrecht von der sache wegen in manende czu der freihunge des landes Gotland vnd der stat Wyssbu deme sie etliche geteilte vorgaben von vnser wegen der her keyns offnemen wolde ♦ Czum leczten wart im gesagt welde her der keyns thun so solde her wissen das wir in laden welden vor das romissche reich do her vns entwerten solde worvmbe wir in beschuldigten als vmbe vortretunge vnd freihunge des landes Gotlant vorgenant vnd der stat Wyssbu ♦ Dorczu entwerte her das her eyn semelichs nicht hette vorbrifet vnd sprach her welde eynen tag mit euch halden von der egesprochen sache wegen dorczu der foith vorgenant sich dirbot von vnser wegen das her in liesse mit imA czihen das her do nicht thun wolde sunder vns zo vil geloubt hat wen Albrecht Rathe vorgenant czulande wedirkeret von Dordrecht by deme welle her vns geben eyne entwert synir gehalden teidingen mit euwern gnaden vnd der botschaft seyn wir noch wartende ouch dorvmbe do vns euwir briff wart geentwert do funden wir ynne das euwir bothe vns solde lassen lesen etliche copien das vns kommerlich mochte geschen dorynne wir funden wie etliche teidinge geschen weren czwusschen euwir grosmechtikeit vnd dem egenanten koning Albrecht die selben copien adir czedeln hochachtende obirlosen vnd nyrne funden in den gehandelten teidingen das wir adir vnser orden bewart weren wer vns die beczalunge thun solde des geldes vnd der schaden getan vnd gehabt vor das egesprochene lant Gotland vnd die stat Wysbu went euwir grosmechtikeit wol wissentlich ist das vns koning Albrecht das selbe lant vnd die stat vorgenanten vorsaczt hat vmbe eyne nemliche summe als syne hauptbrife der vorsatczunge vswysen vnd ist not das wir wissen ap her adir euwir gnade die beczalunge thun wellet vnserm orden ouch wurde wir nicht vs den copien vndirricht ap wir das egenante lant vnd die stat Wysbu euwir allirdurchluchtikeit wedir geben czulosen vnd denne abetreten by welchen gunsten fruntschaften vnd gnaden die ynwoner des selben landes vnd der stat bleiben mochten das in icht bewyset wurde vmbe irre truwe wille czu vns gehabt eyne vorgewalte rothunge obir die sachen vorberurt das wir von euwir grosmechtikeit luterlichin vnderwyset vnd vndirrichtet werden so wellen wir noch offenen tagen so schirest wir mogen vnsern bothen czu euch senden das wir durch in clerlicher aller sachen werdet vndirwyset dornoch wir mit fleisse gedenken wellen wie wir euwern gnaden enthafticlichin denne entwerten mogen wen vns czu frede vnd czu selikeit czu euwern landen vnd vnsern alleczit czu herczen ist worvmbe bitten wir mit fleisse das euwer grosmechtikeit vns nicht vorkere den ofczog eynir enthaftigen entwert went wir den thun muszen durch der egenanten sachen wille bis als lange das wir vndirrichtet werden durch vnsern bothen von euwern gnaden vnd von koning Albrecht vorgenant do mete geruchet vns vnd vnsern orden der gnaden vnd beschirmunge euwir grosmechtikeit von angeborner gute gnediclichin lasse seyn beuolen vor die wir mit gancz vnserm orden demuticlichin bitten wellen allewege got den herren die czubewaren yn gelucseliger wolfart czu langen cziten ♦ Gegeuen off vnserm huse Marienburg am freitage noch epyphanie im xiiiic vnd sechsten iare.