Omnibus presens scriptum cernentibus . Petrus Matisson dictus Saxtorp in Halmstadhe . armiger salutem in Domino sempiternam ♦

Notum facio per presentes . me ex deliberacione matura . quandam curiam meam in Rynnorp . parrochiaA Ottorp . Ludgudhehæret sitam . quæ dat unam marcham argenti pro pensione venerabili capitulo Lundensi . donasse . alienasse necnon in placito terre Scanie scotasse et ad manus libere assignasse . perpetuo possidendam sub condicionibus infrascriptis . ut videlicet anniversarium meum . Benedicte consortis mee dilecte . necnon parentum et liberorum meorum . omni anno . statim post octavas nativitatis beate virginis in ecclesia metropolitana Lundensi teneatur de pensione predicte curie taliter dividenda . ut videlicet canonicis, qui vigiliis et misse interfuerint . xx grossi . vicariis et pro missis xv grossi . fabrice et pauperibus xx grossi . rite cedant ita tamen quod de duabus ultimis partibus quinque sterlingi in turri pro pulsantibus deducantur . ♦ Quare obligo me et heredes meos ad dictam curiam ipsi venerabili capitulo Lundensi predicto appropriandum disbrigandum necnon et ab alloqucione et impeticione quorumcumque perpetuis temporibus liberandum ♦

In quorum evidenciam et testimonium sigillum meum una cum sigillis discretorum et providorum virorum scilicet domini Laurencii Achonis canonici Lundensis Jone Saxtorp . Petri Hachonsson in Syrekøpinge et Jone Nielsson in Swaleff . armigerorum presentibus est appensum . ♦

Datum Lundis anno Domini mcdxxtercio vigilia beatorum Symonis et Jude apostolorum.