Post salutem.

Ersamen leven frunde.

Alse nu de ersame her Hinrik Vorrath, unser stad medeborgermeister, to juw und den andern hensesteden in bodschopp getogen is, so hebben wii em undir etliken unsen befelingen medegegeven, by juw und den andern steden to erfaren, also umme den tollen ymme Sunde, wo id de stede kegen dem heren konige bededinget hadden, efte men den vordan geven solde edder nicht, edder wo men id darmede solde holden, upA dat wii de unsen, de durch den Sund segelen werden, mochten underweisen, wo se sik dorinne solden holdenN.

Alse heft uns her Hinrik darvan nicht geschreven, dat, alse wii vornemen, bygekomen is, dat em de tiit to kort is gefallen und mit der hast vortan kegen Vlandern heft moten trecken.

Worumme juwe ersame wisheidt, wii mit vlitiger begeringe vrundliken bidden, dat gii uns mit den ersten willet vorscriven, wo it umme desulven tollen sy gebleven, efte men den geven sal edder nicht, und wo sik de juwen, de durch den Sund zegelen, dorinne werden holden, und wat befell se van juw in deme dele mede hebben, upA dat wii na dersulven wiise den unsen ok befell und undirrichtinge darvan doen mogen, edder efte her Peter Ochsze den tollen yo hebben wolde, wormedeA men sik des entseggen und weren mochte, upA dat de ding mit eyndracht togingen und de en nicht furder dede denne ander, dar furder schade efte hinderA in tokomenden tyden, beyde den juwen und den unsen, van komen muchte.

Eyn kort antwerde hirvan dat vorschulde wii gerne.

Actum feria quarta post palmarum, anno Domini etc. 36.